Słužba biaśpieki Ukrainy paviedamlaje, što Vasil Prozaraŭ, jaki zajaviŭ pra pracu na karyść Rasii, byŭ zvolnieny z šerahaŭ SBU u 2018 hodzie z-za słužbovaj nieadpaviednaści. Pra heta havorycca ŭ kamientary viedamstva, raspaŭsiudžanaj 25 sakavika paśla ziaŭleńnia Prozarava ŭ efiry rasiejskich ŚMI, pieradaje «Ukrainskaja praŭda».
«Rasijskaja prapahanda tradycyjna ničym nie hrebuje. Tamu nie ździŭlaje, što zdradnikaŭ, jakija ŭsim pahardžajuć, rasiejcy aktyŭna vykarystoŭvajuć dla ahučvańnia svaich zajezdžanych fejkaŭ ab «tajemnych turmach» i h.d.», — adznačajuć u SBU.
Adznačajecca, što Prozaraŭ byŭ zvolnieny z pasady staršaha kansultanta-ekśpierta adnaho z adździełaŭ štaba ATC Słužby biaśpieki Ukrainy za słužbovuju nieadpaviednaść, u pryvatnaści za sistematyčnaje ŭžyvańnie ałkaholu na pracoŭnym miescy, dyskredytacyju zvańnia aficera.
«Prapiŭšy honar aficera, Prozaraŭ vyrašyŭ handlavać sumleńniem i vajennaj prysiahaj, znajšoŭšy ŭ FSB RF «hodnych» ludziej. Ale hety vyradak pavinien pamiatać los Judy. Sprava tolki času», — reziumujuć u SBU.
Taksama na ŭdakładniajučaje pytańnie «Ukrainskaj praŭdy» ŭ pres-słužbie SBU adznačyli, što śpiecsłužba pravieryć, ci moh Prozaraŭ pieradać rasiejcam niejkuju infarmacyju.
Siońnia, 25 sakavika, u dzień stvareńnia SBU, u Rasii zładzili pres-kanfierencyju Vasila Prozarava, jakoha nazvali pierabiežčykam z Słužby biaśpieki Ukrainy.
Prozaraŭ zajaviŭ, što pracavaŭ u SBU z 1999 da 2018 hoda, z 2014 hoda ličyŭsia ŭ centralnym aparacie, štabie ATA.
«Z krasavika 2014 ja dobraachvotna pa ideałahičnych matyvach spryjaŭ RF u atrymańni infarmacyi», — zajaviŭ Prozaraŭ.
Eks-supracoŭnik SBU taksama raskazaŭ pra nibyta datyčnaść ukrainskaha boku da katastrofy małajzijskaha Boeing na Danbasie, «tajemnyja turmy SBU» i datyčnaść ukrainskich śpiecsłužbaŭ da zabojstva vierchavodaŭ niezakonnych uzbrojenych farmiravańniaŭ «ŁNR/DNR».
