Zasory ŭ starych kanalizacyjnych trubach pieratvarylisia ŭ stychijnaje biedstva adrazu dla cełaha padjezda piacipaviarchovaha doma pa vulicy Savieckaj u Homieli. Dom № 46 u centry horada dvojčy na tydzień topić fiekalijami ŭ kvaterach. Žychary nieadnarazova źviartalisia ŭ kamunalnyja słužby, ale tam im paviedamlali tolki toje, što kapitalnaha ramontu ŭ płanach niama.
U redakcyju «Silnych novostiej» źviarnułasia adna z žycharak pieršaha padjezda piacipaviarchovaha doma. Kožny tydzień Halina vymušana pieražyvać vielizarny stres, bo kanalizacyjnyja ścioki topiać jaje kvateru. Apošni raz vada ź fiekalijami vylivałasia praz unitaz i śliŭ vannaj, całkam zatapiŭšy vanny pakoj i kalidor.
Pa słovach žycharoŭ, takija patopy zdarajucca rehularna. Bolšaść kvater u domie zdajucca na sutki. Pastajalcy mianiajucca kožny dzień i vielmi bieskłapotna staviacca da prośbaŭ nie kidać va ŭnitaz staronnija pradmiety i śmiećcie. Ale prablema nie tolki ŭ śmiećci. Sami kanalizacyjnyja truby daŭno sastareli. Susiedzi raspaviadajuć, što paśla kožnaha praryvu ŭ ich kvaterach staić nievynosny pach.
Akramia patopaŭ u kvaterach, padvał u domie praktyčna nie vysychaje. Śmiardziučyja łužyny pa pierymietry ŭsiaho pamiaškańnia. Ad pastajannaj vilhaci na ścienach źjavilisia raskoliny, a vuhał adnaho z padvałaŭ abrynuŭsia faktyčna na hałavu jaho ŭładalniku.
U padjeździe z pastajannych žycharoŭ u asnoŭnym ludzi stałaha vieku. Žyllo Haliny pakutuje bolš astatnich. Jaje susied u svajoj kvatery nie pražyvaje, źjechaŭ niadaŭna, pierad adjezdam pierakryŭ stajak. Ciapier uvieś patok kanalizacyjnych ściokaŭ z padvojnaj siłaj štotydzień «uryvajecca» ŭ kvateru žančyny.
Kapramontu nie było z momantu pabudovy doma. A heta amal 50 hadoŭ. ŽKH prablemu vyrašaje pa-svojmu: pryjazdžaje mašyna i adpampoŭvaje ścioki. U minułym miesiacy Halina napisała skarhu ŭ KŽREUP «Centralnaje», była na pryjomie ŭ načalnika. Adkaz abiacali dasłać na praciahu 10 dzion, ale jaho da hetaha času niama. Ale siakija-takija miery ŭsio ž pryniali.
Dla vyrašeńnia prablemy da doma pryjazdžali adrazu 5 supracoŭnikaŭ dźviuch kamunalnych słužbaŭ — vodakanał i pradstaŭniki KŽREUP. Adpampavaŭšy vadu ź luka, jany znajšli kanalizacyjnuju trubu, jakaja, na ich dumku, źjaŭlajecca pryčynaj zasoraŭ. Ale kab prabracca da jaje, nieabchodna jaje adkapać ad ziamli, jakaja hadami ŭtramboŭvajecca ŭ kanalizacyjnym luku. Vodakanał daručyŭ heta ŽEU, ale na hety momant nijakich rabot nie pravodziłasia.
Atrymać kamientar u hałoŭnaha inžyniera KŽREUP «Centralnaje» nie atrymałasia. Kamientavać prablemu žycharoŭ jon admoviŭsia.
