U sieradu 20 sakavika ŭ Pakalubickim sielsaviecie Homielskaha rajona adbyłosia adkrytaje vyjaznoje pasiadžeńnie suda. Na łavie padsudnych — žychar vioski Kalinina.
30 listapada 2018 hoda abvinavačvany, znachodziačysia ŭ stanie ałkaholnaha apjanieńnia, pahražaŭ zabojstvam staršyni Pakalubickaha sielvykankama Uładzimiru Čerkasu, jaki ŭvachodzić u skład kamisii pa prafiłaktycy bieznahladnaści i pravaparušeńnia niepaŭnaletnich.
Padsudny raniej byŭ šmat razoŭ sudzimy. U 2016 hodzie ŭ jaho naradziłasia dačka. Z 2003 hoda jon znachodzicca na ŭliku ŭ narkałahičnym dyspansiery. Praź luboŭ baćkoŭ da ałkaholu, dzicia pryznali takim, što znachodzicca ŭ sacyjalna niebiaśpiečnym stanoviščy. Niekalki hadoŭ tamu dzicia zabrali ź siamji i pieradali ŭ sacyjalna-piedahahičny centr.
Baćki vypravilisia. Dzicia baćkam viarnuli, a rašeńnie pra sacyjalna niebiaśpiečnaje stanovišča admianili. Ale pakinuli na ŭliku. Štomiesiac siamju naviedvała kamisija. U listapadzie 2018 hoda staršynia Pakalubickaha sielvykankama Uładzimir Čerkas, dyrektar i sacyjalny piedahoh miascovaj siaredniaj škoły Valancina Chamiakova i Maryja Jurusava vyjechali ŭ Kalinina. Padjazdžajučy da doma, sustreli niećviarozaha haspadara.
Užo la płota mužčyna pačaŭ pavodzić siabie ahresiŭna. Niecenzurna łajaŭsia, nie chacieŭ puskać kamisiju ŭ dom. Zatym dastaŭ z kišeni adviortku, razmachvaŭ joju, praciahvaŭ łajacca. U hety čas vyjšła žonka abvinavačanaha, adkryła bramku. Žančyny prajšli ŭ dom, a mužčyny zastalisia na vulicy. Pamiž imi zaviazałasia bojka: abvinavačvany chapaŭsia i za siakieru, jak paźniej rastłumačyŭ, kab adkryć dźviery, i za nož. Usie svaje dziejańni mužčyna dakładna nie pamiataje i pryznaŭsia, što na momant zdareńnia byŭ vypiŭšym. Zabivać staršyniu vykankama jon nie chacieŭ. Spałochaŭsia, što dzicia znoŭ mohuć zabrać.
U vyniku mužčynu pakarali aryštam na try miesiacy. Taksama mužčynu praciahnuć lačyć ad chraničnaha ałkahalizmu.
