Rasija na pasiadžeńni Jeŭrazijskaha mižuradavaha savieta 30 krasavika budzie damahacca admieny rašeńnia Jeŭrazijskaj ekanamičnaj kamisii (JEEK), jakoje abaviazvaje Rasiju nie zakryvać svoj rynak dla biełaruskaha małaka pry najaŭnaści na jaho vieterynarnych dakumientaŭ. Pra heta piša ŭ aŭtorak hazieta Kommiersant.
Vydańnie nahadvaje, što hetaje rašeńnie JEEK źjaŭlajecca reakcyjaj kamisii na abmiežavańni Raśsielhasnahladam pastavak u Rasiju małočnaj pradukcyi ź Biełarusi. U pryvatnaści, u Jeŭrazijskim ekanamičnym sajuzie dziejničaje norma ab uzajemnym pryznańni vieterynarnych siertyfikataŭ, i zakryćcio rynku Rasii ad siertyfikavanaj biełaruskaj pradukcyi JEEK pryznała parušeńniem.
Raśsielhasnahlad z 6 červienia 2018 hoda zabaraniŭ pastaŭki ź Biełarusi niekatorych vidaŭ małaka i małočnaj pradukcyi.
Adnak JEEK paličyła inakš i faktyčna abaviazała Rasiju vykonvać sajuzny dahavor i prymać biełaruskija vieterynarnyja siertyfikaty. Rašeńnie JEEK ustupiła ŭ siłu ŭ kancy lutaha.
Pavodle «Kommiersanta», 21 lutaha pieršy vice-premjer Rasii Anton Siłuanaŭ źviarnuŭsia da staršyni JEEK Tyhrana Sarkisiana z prapanovaj admianić rašeńnie JEEK, bo jano «daje… niapravilny sihnał ab mahčymaści biespakarana złoŭžyvać» normaj ab uzajemnym pryznańni vieterynarnych siertyfikataŭ, bo «biełaruskaj vieterynarnaj słužbaj ažyćciaŭlałasia ŭ tym liku i siertyfikacyja pradukcyi z pradpryjemstvaŭ, jakija nie majuć mahutnaści i abstalavańnia» dla jaje vypusku.
