Astrafiziki ŭpieršyniu zafiksavali ŭ kaśmičnaj prastory hidryd hielija (HeH⁺) — pieršaje malekularnaje złučeńnie, jakoje źjaviłasia paśla Vialikaha vybuchu. Hetaja znachodka paćviardžaje pryniatyja ŭ sučasnaj navucy teoryi ab rańnich etapach raźvićcia Suśvietu, paviedamlaje Meduza.
Adrazu paśla Vialikaha vybuchu ŭ Suśviecie byli tolki vadarod, hielij, a taksama śledavyja kolkaści lityja — z-za vysokaj tempieratury ŭsie jany znachodzilisia ŭ stanie płazmy. Pa miery chutkaha pašyreńnia materyi adbyvałasia jaje astudžeńnie, što dało mahčymaść dla ŭtvareńnia atamaŭ i malekuł. Pieršaj malekułaj i staŭ hidryd hielija - złučeńnie niejtralnaha atama hielija i iona vadarodu. Jon źjaviŭsia prykładna 100 tysiač hadoŭ paśla Vialikaha vybuchu, kali tempieratura składała kala 4000 kielvinaŭ.
U łabaratornych umovach na Ziamli hidryd hielija byŭ atrymany jašče ŭ 1925 hodzie, ale da hetaha času navukoŭcam nie ŭdavałasia atrymać paćvierdžańnie jaho isnavańnia ŭ kosmasie. Śpiektralnyja linii hidryda hielija blizkija da śpiektralnych linij šerahu malekuł ziamnoj atmaśfiery, z-za čaho jaho praktyčna niemahčyma identyfikavać ź Ziamli. U novym daśledavańni dla zboru dadzienych vykarystoŭvałasia latajučaja absiervatoryja SOFIA — samalot Boeing 747SP z ustalavanym na im teleskopam, jaki vioŭ zdymku z vyšyni 13 kiłamietraŭ.