Asnoŭnym kandydatam na pasadu pasła Rasii ŭ Biełarusi staŭ člen Savieta Fiederacyi Dźmitryj Mieziencaŭ. Pra heta RBK raspaviała krynica, blizkaja da administracyi prezidenta Rasii, paćvierdziŭ inšy surazmoŭca, blizki da Kramla, i krynica ŭ Dziarždumie. Surazmoŭca RBK, blizki da MZS Biełarusi, skazaŭ RBK, što Mieziencaŭ źjaŭlajecca adnym z kandydataŭ na pasadu pasła ŭ Minsku, pra heta ž paviedamiła krynica ŭ Saviecie Fiederacyi.
Dźmitryj Mieziencaŭ, fota: kremlin.ru.
Sam Mieziencaŭ u aŭtorak nie adkazaŭ na telefanavańni RBK.
Mieziencaŭ zamienić u Minsku Michaiła Babiča, jaki byŭ pryznačany kiraŭnikom dypmisii ŭ 2018 hodzie i atrymaŭ taksama pasadu śpiecyjalnaha pradstaŭnika prezidenta Rasii pa raźvićci handlova-ekanamičnych stasunkaŭ ź Biełaruśsiu. Ci zachavaje novy pasoł status śpiecpradstaŭnika prezidenta, surazmoŭcy RBK nie skazali.
Adna z krynic, blizkich da Kramla, skazała RBK, što asnoŭnaj pryčynaj zamianić rasijskaha pasła ŭ Minsku stali rehularnyja skarhi Alaksandra Łukašenki na Babiča.
Dziejnaściu Babiča byli niezadavolenyja i ŭ rasijskim MZS, raniej raspaviadała blizkaja da MZS Rasii krynica RBK. «Babič damohsia statusu śpiecpradstaŭnika prezidenta, što davała jamu pramy vychad na prezidenta i jaho administracyju. Niaredka jon vyrašaŭ zadačy ŭ abychod MZS, nie ŭzhadniajučy ź im svaje dziejańni, što nie mahło nie razdražniać MZS», — kazaŭ surazmoŭca RBK.
Kančatkovaje rašeńnie pra zamienu pasła, chutčej za ŭsio, było pryniata paśla sustrečy «na nahach» Uładzimira Pucina i Łukašenki ŭ ramkach forumu «Adzin pojas — adzin šlach» u Piekinie, kaža druhi blizki da Kramla surazmoŭca RBK.
U pasolstvie Rasii ŭ Biełarusi ad kamientaroŭ RBK admovilisia.
Pra chutkuju adstaŭku Babiča paviedamiła 30 krasavika hazieta «Kamiersant» i paćvierdzili dźvie krynicy RBK.
Mieziencaŭ uvajšoŭ u skład Savieta Fiederacyi z 2015 hoda (ad vykanaŭčaj ułady Sachalinskaj vobłaści), jaho paŭnamoctvy jak sienatara skončacca ŭ vieraśni 2019 hoda.
Da taho, jak stać sienataram, Mieziencaŭ byŭ hienieralnym sakratarom Šanchajskaj arhanizacyi supracoŭnictva (ŠAS). Jon taksama byŭ hubiernataram Irkuckaj vobłaści.
