Vybitny biełaruski lekar-chirurh i navukoviec Valery Mikałajevič Stasievič raptoŭna pajšoŭ z žyćcia 4 maja 2019 hoda.
Naradziŭsia 24 krasavika 1949 h. u vioscy Vialiki Bor Chojnickaha rajona Homielskaj vobłaści
Padletkam zastaŭsia biez baćki (Stasievič Mikałaj Śpirydonavič trahična zahinuŭ), byŭ starejšym synam. Maci, Stasievič Kaciaryna Iosifaŭna, hadavała jašče i małodšych Viktara i Kaciarynu.
Z załatym miedalom Valery Stasievič skončyŭ siaredniuju škołu i pastupiŭ u Viciebski miedinstytut, jaki skončyŭ u 1972 hodzie. Lekarskuju karjeru pačynaŭ va Uchvalskaj učastkovaj balnicy Krupskaha rajona Minskaj vobłaści. Za niekalki hadoŭ zrabiŭsia aŭtarytetnym śpiecyjalistam, zajmaŭ pasadu zahadčyka chirurhičnaha adździaleńnia i namieśnika hałoŭnaha lekara Krupskaj rajonnaj balnicy. U 1979 hodzie daterminova i z vydatnaj adznakaj skončyŭ kliničnuju ardynaturu ŭ Biełaruskim Dziaržaŭnym instytucie ŭdaskanalvańnia lekaraŭ. Z 1979 hoda pracavaŭ zahadčykam adździaleńnia chirurhii Minskaj abłasnoj kliničnaj balnicy i nieŭzabavie dasiahnuŭ prafiesijnaha pryznańnia na hetym uzroŭni — abaraniŭ dysiertacyju pa temie «Rekanstrukcyja, jatrahienna paškodžanych, žoŭciavyvodnych šlachoŭ» i z 1989 hoda na kliničnaj i vykładčyckaj pracy na kafiedry chirurhii Biełaruskaj miedycynskaj akademii paśladypłomnaj adukacyi. Paźniej, z 1999 hoda, dekan chirurhičnaha fakultetu hetaj navučalnaj ustanovy. Z 2004 hoda pracavaŭ na kafiedry vajenna-palavoj chirurhii vajskova-miedycynskaha fakulteta Biełaruskaha dziaržaŭnaha mieduniviersiteta. Aktyŭnuju vykładčyckuju i navukovuju dziejnaść zaviaršyŭ u 2012 hodzie na pasadzie prafiesara pamianionaj kafiedry. Z 2012 hoda i da apošnich dzion zajmaŭsia arhanizacyjnaj i kansultacyjnaj rabotaj u miedycynskim centry «Konfidens».
Vyhadavaŭ syna i dačku. Syn, jak i baćka, lekar-chirurh. Dačka — śpiecyjalist IT-haliny.
Letaś, u 2018 hodzie, pry trahičnych akaličnaściach, adyšła jahonaja žonka Leakadzija. Jon ciažka pieražyvaŭ hetuju stratu i nie zdoleŭ jaje pieraadoleć. Serca Doktara spyniłasia…
Raźvitańnie z Valeryjem Mikałajevičam Stasievičam adbudziecca 8 maja 2019 hoda z 10:00 da 12:00 ŭ pamiaškańni žałobnaj zały na Paŭnočnych mohiłkach Minska.
