Pamiežnik kantraktnaj słužby Mikałaj Hudzima zasiliŭsia ŭ noč na 12 maja, jon słužyŭ kiroŭcam u Smarhonskaj pamiežnaj hrupie, paviedamlaje Radyjo Svaboda.
Pieršym pra heta paviedamiŭ u svaim telehram-kanale błohier Nexta. Paźniej zdareńnie paćvierdziŭ Pamiežny kamitet.
Praparščyku Mikałaju Hudzimu było 33 hady. U jaho zastalisia žonka, dvoje dziaciej, baćki.
Jak raskazaŭ stryječny brat niabožčyka Juryj, 11 maja Mikałaj byŭ na dni narodzinaŭ svajoj chreśnicy ŭ Smarhoni. Paśla śviata jany pajechali načavać u baćkoŭski dom u Sołach Smarhonskaha rajona. Ranicaj cieła mužčyny ŭ haspadarčaj prybudovie znajšoŭ baćka.
Ab pryčynach śmierci svajak nie biarecca kazać i nie viedaje, ci jana niejak źviazanaja sa słužbaj.
Viadoma, što pierad śmierciu Hudzima pakinuŭ zapisku.
«Lublu žonku, dziaciej. Heta niejkija suroki. Vola [žonka zahinułaha — RS], pradavaj kvateru i źjazdžaj z hetaha horada. Mama, tata, dziakuj za ŭsio», — pa pamiaci pierakazvaje apošnija słovy niabožčyka Juryj.
Juryj kaža, što i baćka Mikałaja kazaŭ, nibyta jamu padkidvali lalek, jakija navodziać čary.
Siamja Hudzimaŭ, pa słovach brata, była dobraj, zamožnaj, Mikałaj ałkaholem nie złoŭžyvaŭ. Jany niadaŭna nabyli kvateru ŭ Smarhoni. Žonka taksama słužyć u Smarhonskaj pamiežnaj hrupie.
Pachavańnie adbudziecca 14 maja ŭ vioscy Soły Smarhonskaha rajona.
Aficyjny pradstaŭnik Dziaržaŭnaha pamiežnaha kamitetu Anton Byčkoŭski paćvierdziŭ Radyjo Svaboda, što sapraŭdy 12 maja ŭ 6.30 ranicy pa miescy žycharstva baćkoŭ było znojdziena cieła vajskoŭca-kantraktnika Mikałaja Hudzimy.
«Praparščyk Mikałaj Hudzima pa słužbie charaktaryzujecca stanoŭča. Pavodle papiaredniaj infarmacyi, heta suicyd, nie źviazany sa słužbovaj dziejnaściu praparščyka. Pracuje śledčaja apieratyŭnaja hrupa, jakaja vyśviatlaje pryčyny i abstaviny trahiedyi. Inšych padrabiaznaściaŭ pakul paviedamić nie možam. Dziaržaŭny pamiežny kamitet vykazvaje svaje spačuvańni siamji i akazvaje dapamohu», — paviedamiŭ pałkoŭnik Anton Byčkoŭski.
Pakul śćviardžajecca, što suicyd nie źviazany sa słužbovaj dziejnaściu.
