Školny muziej Barysa Kita ŭ Navahrudku, jaki mieścicca ŭ budynku byłoj himnazii, dzie jon byŭ dyrektaram, bolš nie nosić jaho imia, piša Hrodna.life.
Barys Kit, słavuty ŭ śviecie daśledčyk kosmasu, skončyŭ Navahrudskuju biełaruskuju himnaziju u 1928 h., a vosieńniu 1939 staŭ dyrektaram himnazii. Navahrudskaja SŠ №1 mieścicca ŭ budynku toj samaj byłoj himnazii.
Z 2007 hoda tam adkryli muziej imia Barysa Kita. Jon uklučaje raździeły, źviazanyja z historyjaj škoły, i miemaryjalny pakoj Kita. U ekspazicyi — dakumienty, ekspanaty, źviazanyja z žyćciom i dziejnaściu byłoha dyrektara i vykładčyka. Paviedamlałasia, što ekspazicyja ŭ škole stvorana navukovymi supracoŭnikami Navahrudskaha historyka-krajaznaŭčaha muzieja. Sioleta muziej pamianiaŭ svaju nazvu, u joj bolš nie zhadvajecca imia słavutaha navukoŭca.
Čytač Hrodna.life z Navahrudka raskazaŭ, što źmiena nazvy muzieja adbyłasia paśla vizitu kamisii pa adukacyi, jakaja nie ŭchvaliła, što heta muziej mienavita imia Barysa Kita. Pavodle infarmacyi čytača, muziej źbirajucca nie tolki pieranazvać, ale i zrabić ekspazicyju, pryśviečanuju vieteranam nastaŭnickaj pracy, i ŭžo miž inšymi budzie zhadvacca Barys Kit.
Miemaryjalnaja doška na budynku škoły.
Dyrektarka SŠ №1 Ała Stalarčuk patłumačyła, što kamisii nie było, nazvała heta čutkami. Pavodle jaje, muziej pierajmienavali, bo z 2017 hoda abjadnali dźvie škoły, №1 i №2. U №2 taksama byŭ muziej škoły, jamu vyłučyli pamiaškańnie, i ahulny muziej ciapier nazyvajecca «Viechi historii». Pa słovach spadkajemcy Barysa Kita, pierajmienavańnie adbyłosia ŭ pačatku 2019 hoda zhodna z rašeńniem piedsavieta. Dyrektarka škoły skazała, što pieranosić muziej ci mianiać ekspazicyju nie źbirajucca.
Načalnica ŭpraŭleńnia adukacyi Navahrudskaha rajvykankama Ludmiła Maroz adkazała, što nie vałodaje infarmacyjaj ni pra pierajmienavańni, ni pra kamisiju, i kamientavać hetaje pytańnie admoviłasia.
Namieśnica staršyni vykankama pa pytańniach adukacyi Śviatłana Karalko paćvierdziła infarmacyju, atrymanuju ŭ škole: źmiena nazvy źviazanaja z abjadnańniem dźviuch navučalnych ustanoŭ, dakumienty pačali rychtavać u 2018 hodzie, kamisija dačynieńnia da hetaha nie maje.
Na sajcie škoły na staroncy «Historyja škoły» Barys Kit značycca jak «učienyj — astronavt mira, diriektor škoły v 1939 h.». U škole jość taksama pijanierskaja družyna imia Kita.
Barys Kit, doktar fiłasofii ŭ halinie matematyki i historyi navuki, źjaŭlajecca hanarovym doktaram navuk Hrodzienskaha dziaržaŭnaha univiersiteta imia Janki Kupały, Hanarovym hramadzianinam Navahrudka. Navahrudski muziej zachoŭvaje kala 600 ekspanataŭ, pieradadzienych Barysam Kitam — jaho asabistyja rečy, publikacyi, fotazdymki, uznaharody. Barys Kit pamior 1 lutaha ŭ Frankfurcie-na-Majnie na 108 hodzie žyćcia.
