Śviatasłaŭ Baranovič užo bolš za 90 sutak znachodzicca ŭ štrafnym izalatary ŭ turmie horada Žodzina, kudy jaho pieraviali 17 lutaha dla adbyćcia rešty termina pakarańnia. Pra heta paviedamiła pravaabaroncam «Viasny» jaho siastra Natalla.
Jana chvalujecca za fizičny i psichałahičny stan brata, bo ŭ štrafnym izalatary vielmi žorstkija ŭmovy, kab znachodzicca tam taki praciahły termin. Akramia taho, što jon całkam izalavany ad inšych źniavolenych, tudy zabaroniena brać ułasnyja rečy, navat knihi. Pry takich umovach taksama nielha atrymlivać listy, pieradačy i karystacca hrašyma na rachunku. U izalatary łožak adkidajecca ad ściany tolki na noč, a na dzień viartajecca da ściany. Tamu ŭ hety čas jon vymušany siadzieć i lažać na padłozie.
Taksama Natalla adznačaje, što da hetaha času nie vyrašanaja prablema z akularami. U Śviatasłava i tak nizki zrok, a kali budzie doŭha chadzić biez akularaŭ, to situacyja sa zdaroŭjem jaho vačej moža surjozna pahoršycca.
Da 17 lutaha Śviatasłaŭ, znachodziačysia ŭ papraŭčaj kałonii №1 h. Navapołacka, prabyŭ u štrafnym izalatary kala 210 sutak.
Nahadajem, Śviatasłava Baranoviča asudzili za hvałt u dačynieńni da supracoŭnika milicyi padčas «Marša niedarmajedaŭ» 15 sakavika 2017 hoda. 12 sakavika sud Maskoŭskaha rajona h. Minska asudziŭ Baranoviča na 3 hady pazbaŭleńnia voli.
