Pierad budynkam parlamenta Hruzii ŭ Tbilisi adnaviłasia akcyja pratestu. Va ŭdzielnikaŭ akcyi zastałosia adno hałoŭnaje patrabavańnie — adstaŭka kiraŭnika MUS Hruzii Hieorhija Hacharyja, piša radyjo «Svaboda».
Jak zajaŭlajuć arhanizatary, pakul nia budzie vykanana apošniaje patrabavańnie, akcyi praciahnucca.
Siońnia, 26 červienia, užo siomy dzień pratestnaj akcyi kala budynka parlamenta Hruzii.
Antyrasiejskija pratesty praciahvajucca ŭ Tbilisi z 20 červienia. Jany vyklikanyja tym, što deputat Dziarždumy RF Siarhiej Haŭryłaŭ, hałava delehacyi Mižparlamenckaj asamblei pravasłaŭja, jaki padtrymlivaje pryznańnie Maskvoj niezaležnaści Abchazii i Paŭdniovaj Asetyi, zaniaŭ kresła śpikiera hruzinskaha parlamentu i źviarnuŭsia da prysutnych na rasiejskaj movie.
20 červienia pratesty pieraraśli ŭ sutyknieńni pratestoŭcaŭ z palicyjaj, jakaja ŭžyła ślezaciečny haz i humovyja kuli suprać demanstrantaŭ (jakich usiaho było kala 10 000) i razahnała akcyju. Ministerstva achovy zdaroŭja Hruzii paviedamiła pra 240 paciarpiełych, ź jakich 80 palicejskich. Bolš za 300 pratestoŭcaŭ byli zatrymanyja.
21 červienia prezydent RF Uładzimir Pucin padpisaŭ ukaz, u adpaviednaści ź jakim z 8 lipienia ŭvodzicca časovaja zabarona na pasažyrskija avijaznosiny z Hruzijaj.
