Rasiju viarnuli ŭ Parłamienckuju asambleju Rady Jeŭropy. Ja absalutna ščyra razumieju abureńnie ludziej hetym faktam. Ale kali ludzi, u tym liku biełarusy, masava pačali pisać pra zdradu Jeŭropy… Davajcie biez emocyj, a prosta fakty.
Čamu jeŭrapiejskija krainy abaviazany admaŭlacca ad supracoŭnictva z Rasijaj, kali značnaja častka ŭkrainskaha (i biełaruskaha) hramadstva, niahledziačy na vajnu i biedy, jakija pryniesła Rasija, sama choča siabravać z Rasijaj?
Čamu jeŭrapiejskija krainy krytykujuć za handal z Rasijaj, chacia sama Ukraina (i Biełaruś) praciahvaje handlavać z Rasijaj?
Čamu jeŭrapiejskija krainy pavinny być łajalnymi da Ukrainy, kali na šosty hod vajny značnaja častka ŭkrainskaha (i biełaruskaha) hramadstva sama zastajecca niełajalnaj da svaich dziaržaŭ, ich moŭ i kultur? Jak možna patrabavać ad jeŭrapiejcaŭ achviarnaści, kali značnaja častka ŭkrainskaha (i biełaruskaha) hramadstva da hetaj achviarnaści sama nie hatovaja, i zamiest budavańnia mocnaj dziaržavy dumaje tolki pra svoj straŭnik, nizkija taryfy na kamunałku, jak by adkasić ad armii i nie płacić padatkaŭ? Kali Ukraina nie zmahła danieści navat da značnaj častki svaich hramadzian infarmacyju pra ahresiju i złačynstvy Rasii, navošta tady kryŭdzicca na prostych žycharoŭ Niderłandaŭ, Niamieččyny i inšych dalokich krain? Heta niejkaja dziŭnaja pazicyja.
Naiŭna dumać, što Ukraina ŭsprymajecca ŭ bahatych jeŭrapiejskich krainach jak hałoŭnaja prablema, a Rasija — jak hałoŭnaja pahroza i vyklik. Paviercie, hetaje pytańnie nastolki pieryfieryjnaje dla vialikich jeŭrapiejskich krain, što jano nie źjaŭlajecca hałoŭnym na paradku dnia. Pačytajcie niamieckuju ci niderłandskuju presu, i vy zrazumiejecie, što ich hałoŭnyja prablemy takija: hłabalnaje paciapleńnie, kibierbiaśpieka, ličbavizacyja ekanomiki. Nam, viadoma, va Uschodniaj Jeŭropie zdajecca, što my centr śvietu, ale, na žal, heta nie tak. Rasija ŭsprymajecca jak hałoŭnaja pahroza tolki chiba što Polščaj, Šviecyjaj i krainami Bałtyi. Heta treba ŭličvać i z hetym treba žyć.
