27 červienia kancler FRH Anhieła Mierkiel prysutničała na cyrymonii pryznačeńnia novaha ministra justycyi Kryścin Łambrecht. Padčas pramovy prezidenta Franka-Valtera Štajnmajera žurnalisty źviarnuli ŭvahu na toje, što Anhieła Mierkiel dryžyć, piša VVS.
Heta adbyłosia ź Mierkiel druhi raz za dva tydni. U čas sustrečy z prezidentam Ukrainy Uładzimiram Zialenskim 18 červienia kancler taksama prykmietna dryžała.
Žurnalisty hadajuć, što ž adbyvajecca. U minuły raz Mierkiel patłumačyła dryžyki tym, što joj vielmi chaciełasia pić i było horača. Na hety raz kiraŭnictva spraŭ kanclera prakamientavała zdareńnie skupa.
Mierkiel adčuvaje siabie vydatna, budzie ŭdzielničać u samicie «Vialikaj dvaccatki» ŭ Osacy 28—29 červienia i samicie Jeŭrasajuza 30 červienia, zajavili tam.
Žurnalisty sprabujuć znajści tłumačeńnie. Voś niekalki asnoŭnych viersij niamieckich ŚMI.
Psichałahičnyja pryčyny?
Krynicy haziet Stuttgarter Zeitung i Stuttgarter Nachrichten va ŭradzie kažuć, što pryčyna druhoha prystupu dryžykaŭ była psichałahičnaj.
Ich cytuje sajt haziety Sueddeutsche Zeitung. «Uspamin pra minuły incydent pryvioŭ da novaha. Heta psichałahičny praces», — havorycca ŭ artykule.
Jaho aŭtar adznačaje, što ŭ vysokapastaŭlenych niamieckich palitykaŭ niama asabistych lekaraŭ. «Dobra, što kiraŭnik aparata kancylaryi Chelha Braŭn pa adukacyi aniestezijołah i lekar reanimacyi», — piša hazieta.
Stres na pracy?
«Kali Mierkiel dryžyć — źlatajucca ściarviatniki», — taki zahałovak maje artykuł adnaho ź piaci vydaŭcoŭ pravacentrysckaj Frankfurter Allgemeine Zeitung, Biertolda Kolera.
«Za 14 hadoŭ va ŭładzie Mierkiel pakazała stojkaść — i fizičnuju, i psichałahičnuju. Ci možna dapuścić, što ciažkaja nahruzka, jakija zaŭsiody asacyjavalisia ź jaje pasadaj, pačynaje adbivacca na zdaroŭi?» — pytajecca žurnalist.
Koler ličyć, što, kamientaroŭ u duchu «kancler u paradku» ŭžo niedastatkova, uličvajučy važnaść pasady Mierkiel.
Adnak, dadaje jon, Mierkiel jaŭna adčuvała siabie ŭ formie — jana biez prablem ździejśniła doŭhi pieralot u Osaku na samit «na zvyčajnym uradavym samalocie, a nie na miedycynskim «Aerobusie» Bundeśviera, jak mahło b zdacca ŭ śviatle takoha mnostva addalenych dyjahnazaŭ».
Žurnalist Franc Jozef Vahnier ličyć, što Anhieła Mierkiel «stała ŭraźlivaj».
«Kanflikt u tym, što kancler nie moža dryžać. Kali dryžyć kancler — dryžyć dziaržava. U kanclera pavinna być žaleznaje zdaroŭje. Jana ŭstaje da śvitańnia i viadzie pieramovy da poźniaj nočy. Amal nie śpić. Naša kancler zroblena ź niervaŭ, vien i muskuł. Jana składajecca z serca i dušy», — piša Vahnier ŭ tabłoidzie Bild.
Jon rekamienduje Mierkiel «prosta zastavacca ŭ łožku».
Havoračy ab mahčymych pryčynach stanu kanclera, Bild nazvaŭ niedachop vadkaści, hipahlikiemiju i hipahlikiemičny šok.
«Ci vytrymaje jana?» — pytajecca aŭtar natatki.
Mierkiel rychtujecca syści?
«Dryžyki Anhieły Mierkiel padymajuć pytańni ab stanie jaje zdaroŭja. I ab rańnim raźvitańni», — havorycca ŭ artykule na sajcie haziety Tagesspiegel.
Aŭtar namiakaje, što niešta padobnaje moža adbycca z čałaviekam, u hrafiku jakoha faktyčna niama pierapynkaŭ. «Ale heta druhi raz za vosiem dzion», — adznačaje aŭtar.
«Ci nie staić za hetym niešta bolš surjoznaje? Ci pavinny my, jak vykazaŭ zdahadku adzin važny palityk z Chryścijanska-demakratyčnaha sajuza, dumać ab jaje rańnim sychodzie?» — pytajecca aŭtar artykuła.
Surjoznaja chvaroba?
U artykule na sajcie libieralnaha štotydniovika Focus, jaki abmierkavaŭ simptomy Mierkiel ź lekaram jašče paśla pieršaha incydentu, ekśpiert kaža, što nie vyklučaje surjoznaj chvaroby.
Paśla prystupu dryžykaŭ, što adbyŭsia ź Mierkiel 18 červienia, kiraŭnik asacyjacyi siamiejnych lekaraŭ Hiermanii Jakab Bierhier kazaŭ, što nie bačyć padstaŭ dla chvalavańnia. Ciapier ža jon ličyć, što, «uličvajučy paŭtareńnie simptomaŭ, miedycynskaje tłumačeńnie treba znajści terminova».
Lekar, zrešty, vyklučyŭ, što ŭ Mierkiel moža być chvaroba Parkinsana.
«Taki čałaviek, jak Anhieła Mierkiel, jaki ŭvieś čas pavinien pracavać i biehać ź mierapryjemstva na mierapryjemstva, całkam moža chavać hetyja simptomy, ale jaje lekary pavinny vyvudzić ź jaje infarmacyju», — kaža jon.
Mierkiel zajaviła pra adsutnaść prablem sa zdaroŭjem
Mierkiel stała kiepska padčas sustrečy ź Zialenskim, jaje naturalna tresła VIDEA
Anhiele Mierkiel znoŭ stała drenna na sustrečy na najvyšejšym uzroŭni VIDEA
Publikujecca ŭ miežach śpiecyjalnaj rubryki «Naviny Hiermanii»
