Prezident Jeŭrapiejskich alimpijskich kamitetaŭ (JEAK) Janez Kačyjančyč admaŭlaje abaviazacielstvy jaho arhanizacyi pierad Biełaruśsiu pa pryciahnieńni bujnych mižnarodnych sponsaraŭ pad praviadzieńnie II Jeŭrapiejskich hulniaŭ u Minsku. Pra ich u lutym kazaŭ premjer-ministr Biełarusi Siarhiej Rumas, padkreśliŭšy niezadavalnieńnie dziejańniami JEAK, piša Tut.by
— Ja čuŭ hetuju zajavu, ale ŭ kantrakcie [JEAK ź Biełaruśsiu] ničoha nie napisana, chto za što adkazvaje, — zajaviŭ Kačyjančyč na pres-kanfierencyi ŭ Minsku pierad cyrymonijaj zakryćcia hulniaŭ. — My chacieli b dapamahčy, arhanizavali padtrymku, abraŭšy dosyć źmiastoŭny padychod. Vybrali praz svoj mižnarodny adździeł adnu arhanizacyju, jakaja b vyznačyła stratehiju i inšuju, jakaja pavinna była realizavać jaje. Na žal, hetyja namahańni nie pryviali da pośpiechu. Nam nieabchodny dakładny analiz taho, što adbyłosia. My inviestavali peŭnyja srodki ŭ hety prajekt. Ale hetaha nie było prapisana ŭ našym kantrakcie z krainaj-haspadyniaj, što JEAK adkazvaje za pryciahnieńnie źniešnich sponsaraŭ. My prosta chacieli dapamahčy.
— Kolki JEAK vydatkavaŭ na praviadzieńnie Jeŭrapiejskich hulniaŭ u Minsku?
— My pakryli bolšuju častku vydatkaŭ, źviazanych z udziełam spartsmienaŭ. Raschody na pieramiaščeńnie — heta prykładna dziesiać miljonaŭ jeŭra.
Na lutaŭskaj sustrečy Rumasa i Kačyjančyča, jakaja adbyłasia ŭ Rymie, abmiarkoŭvalisia mahčymyja vychady ź situacyi. «Damovilisia, što biełaruski bok voźmie na siabie bolš pracy pa pryciahnieńni fundataraŭ u takich premijalnych siektarach, jak naftapierapracoŭka, bankaŭskaja sprava, napoi», - skazaŭ tady premjer-ministr.
26 červienia ministr finansaŭ Maksim Jermałovič raskazaŭ u parłamiencie, što ŭsiaho Biełaruś vydatkavała na Jeŭrapiejskija hulni 540 miljonaŭ rubloŭ, u tym liku ź biudžetu - 266 miljonaŭ. Niebiudžetnyja hrošy — heta sponsarskaja dapamoha, jakuju akazali pradpryjemstvy respubliki, srodki ad prodažu kvitkoŭ i kredyty Banka raźvićcia, jakija pryciahvalisia biudžetnymi i kamiercyjnymi arhanizacyjami.
