Livijskija śpiecsłužby aryštavali ŭ Trypali dvuch rasijan pa abvinavačvańni ŭ sprobie paŭpłyvać na vynik parłamienckich i prezidenckich vybaraŭ, jakija ŭłady Livii płanujuć pravieści u 2019 hodzie, paviedamlaje Bloomberg.
Pavodle ahienctva, dva hramadzianie Rasii byli zatrymanyja jašče ŭ mai, kali sprabavali arhanizavać sustreču z synam byłoha lidara krainy Muamara Kadafi Siejfam al-Isłamam, jaki ličycca patencyjnym kandydatam na pasadu prezidenta Livii.
Infarmacyja na kanfiskavanych u zatrymanych noŭtbukach i fłeškach pakazvaje, što abodva jany pracavali na kampaniju, «jakaja śpiecyjalizujecca na ŭmiašańni ŭ vybary, jakija namiečany ŭ niekalkich krainach Afryki», u tym liku Livii. U dakumiencie havorycca taksama, što treciamu rasijaninu ŭdałosia pakinuć Liviju da praviadzieńnia apieracyi śpiecsłužb.