Alaksandr Łukašenka 10 lipienia ŭručyŭ hienieralskija pahony adrazu vaśmiarym pradstaŭnikam siłavoha błoku. Mahčyma, užo najbližejšym časam chtości ź ich pojdzie na pavyšeńnie.
Uładzisłaŭ Budzik: raźbiraŭsia ź dziedaŭščynaj u Piečach
Fota «Minsk-naviny».
Hvardyi pałkoŭnik Uładzisłaŭ Budzik atrymaŭ viadomaść paśla taho, jak u kastryčniku 2017 hoda ŭznačaliŭ 72-i hvardziejski abjadnany navučalny centr padrychtoŭki Uzbrojenych siłaŭ u Piečach pad Barysavam. Adbyłosia heta akurat paśla taho, jak u miežach vajskovaj čaści byŭ znojdzieny paviešanym šarahoviec Alaksandr Koržyč. Heta sprava atrymała vialiki rozhałas u hramadstvie i pryciahnuła ŭvahu da prablemy dziedaŭščyny ŭ našych Uzbrojenych siłach.
Da hetaha Budzik byŭ načalnikam upraŭleńnia słužby vojskaŭ Uzbrojenych siłaŭ. Faktyčna Budzik zamianiŭ ofisnuju pracu na palavuju. Navaśpiečanamu hienierał-majoru 50 hadoŭ.
Što zrabiŭ Budzik u Piečach? Pieršym čynam jon pravioŭ atestacyju aficerskaha i siaržanckaha składu, tyja, chto nie prajšli atestacyju, byli adpraŭlenyja ŭ inšyja vajskovyja čaści. U zadaču Budzika staviłasia naviadzieńnie dyscypliny ŭ Piečach. Cikava, što novy načalnik pieranios čas padjomu sałdataŭ z 6:00 na 7:00.
Leanid Kasinski: ideołah vojska
Fota mil.by.
47-hadovy Leanid Kasinski apošni hod źjaŭlajecca pamočnikam ministra abarony pa ideałohii. Kasinski rodam z Hrodna, vučyŭsia ŭ Jekaciarynburhskim vyšejšym artyleryjskim vučyliščy (1992) i Vajskovaj akademii (2006).
Adznačym, što Kasinski papracavaŭ ideołaham u toj samaj Piečynskaj vučebcy. Na pracu ŭ Ministerstva abarony Kasinski trapiŭ u 2014 hodzie. Na siońnia ŭ padnačieleńni Kasinskaha znachodzicca hałoŭnaje ŭpraŭleńni ideałahičnaj raboty Minabarony, infarmacyjnaje ahienctva «Vajar», Dramatyčny teatr Biełaruskaj armii, Centralny dom aficeraŭ, telekampanija «VajenTB» i šmat inšaha.
Sam Kasinski ŭvahu da siabie pryciahnuŭ vykazvańniem pra hieorhijeŭskija stužki. «Absalutna słušna, što ŭ apošnija hady vykarystańniu hieorhijeŭskaj stužki sprabujuć nadać niekatoryja inšyja sensy. Ale heta sprabujuć zrabić pieradusim tyja, chto choča skazić histaryčnuju praŭdu i prynizić značeńnie Vialikaj Pieramohi, unieści raskolinu miž narodami, jakija jaje atrymali. Upeŭnieny, što ŭ našaj krainie čorna-aranžavaja stužka asacyirujecca nie z čym inšym, jak z hetaj vialikaj padziejaj», — adkazaŭ Kasinski na zvarot žurnalista Alaksandra Tamkoviča.
Aleh Miščanka: hałoŭny suviazist Minabarony
Apošnija dva hady Aleh Miščanka źjaŭlajecca načalnikam suviazi Uzbrojenych siłaŭ. Miščanku 50 hadoŭ, a rodam jon z Čarnihaŭskaj vobłaści Ukrainy (jak i dziaržsakratar Rady biaśpieki Stanisłaŭ Zaś). Vučyŭsia Miščanka ŭ Kijeŭskim vyšejšym vajskova-inžyniernym vučyliščy (1990), Vajskovaj akademii Biełarusi (1999).
Byŭ kamandziram bataljona suviazi, kamandziram asobnaha pałka suviazi. U centralnym ofisie Minabarony Miščanka ad 2014 hoda. Pałkoŭnik (a ciapier užo hienierał-major) Miščanka šmat jeździć pa vajskovych častkach krainy, kab praviarać dziejnaść suviazistaŭ.
Pa słovach Miščanki, suviazisty ŭ Biełarusi — heta «vysokamabilny rod śpiecyjalnych vojskaŭ, jaki zdolny zabiaśpiečvać vyšejšamu vajskova-palityčnamu kiraŭnictvu krainy kiravańnie Uzbrojenymi siłami i inšymi vajskovymi farmiravańniami».
Ihar Burmistraŭ: nastupnik Karajeva?
Pieršy namieśnik kamandujučaha ŭnutranymi vojskami MUS Ihar Burmistraŭ taksama staŭ hienierał-majoram. Paśla taho jak były kamandzir UV Juryj Karajeŭ staŭ ministram unutranych spraŭ, mienavita Burmistraŭ vykonvaje abaviazki kamandujučaha. Miarkujecca, što jakraz Burmistraŭ u najbližejšaj pierśpiektyvie ŭznačalić unutranyja vojski.
Pra Burmistrava viadoma niamnoha. Jon vučyŭsia ŭ Ardženikidzeŭskim vyšejšym vajskovym kamandnym čyrvonaznamionnym vučyliščy imia Kirava MUS SSSR. Pra vučobu ŭspaminaŭ, što davałasia niaprosta, bo davodziłasia pryvykać i da vialikich fizičnych nahruzak, i da vysakahorja.
«Dva hady my vykonvali zadačy ŭ «haračych punktach»: pačynaŭsia razvał Sajuza, masavyja biesparadki — Sumhait, Jerevan, Tbilisi…» — zhadvaŭ Burmistraŭ.
Užo paśla razvału SSSR Burmistraŭ apynuŭsia ŭ Biełarusi, słužyŭ u Połacku, Hrodnie, Homieli. Uznačalvaŭ vajskovuju častku 5448 u Minsku. «Słužba va ŭnutranych vojskach — sprava majho žyćcia. Hetaj słužbaj ja hanarusia i daražu joj», — adznačaŭ siłavik.
Siarhiej Pasko i Andrej Lis: kiraŭniki SK uschodnich abłaściej
Hienierał-majorami justycyi stali načalniki ŭpraŭleńniaŭ Śledčaha kamiteta pa Homielskaj i Mahiloŭskaj abłaściach Siarhiej Pasko i Andrej Lis.
Siarhiej Pasko. Fota gp.by.
Siarhieju Pasko 44 hady, jon minčuk. Vučyŭsia ŭ niedziaržaŭnym instytucie pravaznaŭstva. Ad 1996 — na roznych pasadach u prakuratury Zavadskoha rajona Minska. Ad 2008 — u Hienieralnaj prakuratury. U Śledčym kamitecie ad momantu ŭtvareńnia struktury (2012 hod). Byŭ namieśnikam načalnika upraŭleńnia SK pa Minsku. U 2016 — pieraviedzieny ŭ Homiel.
Što tyčycca Andreja Lisa, to jamu 43 hady. Jon pachodzić ź vioski Liskava Kleckaha rajona. U Śledčy kamitet pryjšoŭ z orhanaŭ MUS, a nie prakuratury. Taksama, jak i Pasko, u SK z momantu stvareńnia.
Andrej Lis. Fota sb.by.
Andrej Lis byŭ namieśnikam načalnika ŭpraŭleńnia SK pa Minskaj vobłaści. «Za pieryjad raboty ŭ śledčych orhanach Andrej Ivanavič nazapasiŭ značny vopyt i prafiesijnyja viedy, jakija ŭ poŭnaj miery realizuje ŭ svajoj słužbovaj dziejnaści. Jon maje ŭsie dadzienyja dla taho, kab paśpiachova arhanizavać pracu ŭpraŭleńnia», — kazaŭ pra Lisa staršynia SK Ivan Naskievič pry pryznačeńni ŭ Mahiloŭ u 2016 hodzie.
Alaksandr Vasiljeŭ: pamianiaŭ zakładnikaŭ na siabie
Fota sb.by.
U milicyi taksama źjaviŭsia novy hienierał-major, im staŭ 44-hadovy načalnik upraŭleńnia ŭnutranych spraŭ Homielskaha abłvykankama Alaksandr Vasiljeŭ. Jon sam rodam z Mahilova, tam ža vučyŭsia na miascovym fakultecie Akademii MUS. Ad 1994 — opier u Kastryčnickim rajonie Mahilova.
Ad 2009 da 2014 uznačalvaŭ milicyju ŭ Babrujsku. Ad 2014 — byŭ načalnikam kryminalnaj milicyi ŭ Mahiloŭskaj vobłaści. U Homieli ad 2018 hoda.
Viadomaść i pašanu Alaksandr Vasiljeŭ zdabyŭ u 2017 hodzie, kali ŭ Mahilovie złačynca ŭziaŭ u zakładniki 14 naviednikaŭ banka. Tady Vasiljeŭ pryniaŭ rašeńnie pamianiać siabie na zakładnikaŭ. U vyniku złodziej vyvodziŭ Vasiljeva z banka ź pistaletam la skroni. «U toj momant byŭ spakojny jak udaŭ, uśviedamleńnie pryjšło ŭžo potym», — kazaŭ jon.
Syn Alaksandra Vasiljeva vučycca taksama ŭ Akademii MUS.
Anatol Daŭhalaviec: pažarny z Salihorska
Fota lidanews.by.
Urešcie hienierał-majoram unutranaj słužby staŭ namieśnik ministra nadzvyčajnych spraŭ Anatol Daŭhalaviec. Jamu taksama 45 hadoŭ, a rodam ź vioski Zaŭšycy Salihorskaha rajona. Dziacinstva prajšło ŭ samim Salihorsku, bo kvateru tam atrymała mama, jakaja pracavała sihnalistkaj na šachcie.
Vučyŭsia ŭ Salihorskim horna-chimičnym technikumie na adździaleńni «Pažarnaja biaśpieka», paśla — u vyšejšym pažarna-techničnym vučyliščy MUS. Kaža, što pajści ŭ pažarnyja paraiŭ dziadźka.
Papracavaŭ u Salihorsku, Klecku, Lidzie, Minsku, Homieli. Byŭ namieśnikam staršyni Salihorskaha rajvykankama. Apošnija paŭtara hoda źjaŭlajecca namieśnikam ministra.
«Da hetaha času z bolem ŭspaminaju pieršy vypadak. Adbyŭsia jon u vioscy Kleckaha rajona. Baćki pakinuli čatyrochhadovaje dzicia adnaho, a ŭ domie zdaryŭsia pažar. Pažarnyja karavuły i ja z učastkovym inśpiektaram prymčalisia na miesca zdareńnia. Da hetaha času susied vyciahnuŭ małoha, jaki ŭžo nadychaŭsia praduktami hareńnia z pałajučaha doma. Ja pačaŭ rabić dziciaci štučnaje dychańnie, padaśpieła chutkaja, ale vyratavać jaho tak i nie atrymałasia… A tak, za čas pracy ŭsiakaje byvała. Pažary, avaryi… U likvidacyi ich prymaŭ i niepasredny ŭdzieł», — uspaminaŭ Anatol Daŭhalaviec.
