Čaćviora aŭstralijskich padletkaŭ skrali ŭsiedarožnik, zahruzili jaho rybałoŭnymi snaściami i prajechali bolš za 900 kiłamietraŭ na poŭdzień kantynienta, paviedamlaje BBC.
Troje chłopčykaŭ i dziaŭčynka, va ŭzroście ad 10 da 14 hadoŭ, byli znojdzieny ŭ niadzielu zdarovymi i cełymi ŭ miastečku Hraftan, u štacie Novy Paŭdniovy Uels.
U minułyja vychadnyja jany vyjechali z Hrejśmira ŭ štacie Kvinślend. Nakolki viadoma, adzin z chłopčykaŭ pakinuŭ baćkam zapisku, što sychodzić z domu.
U palicyi paviedamili, što majuć namier pradjavić padletkam abvinavačvańni, choć pakul što nie jasna, jakija mienavita.
Pavodle infarmacyi miascovych uładaŭ, čaćviora padletkaŭ — z roznych siemjaŭ. Jany skrali ŭsiedarožnik adnaho z baćkoŭ.
Ranicaj u niadzielu, prykładna za 140 kiłamietraŭ ad domu, padletki spynilisia na bienzakałoncy ŭ horadzie Banana i zapravilisia, paśla čaho źjechali, nie raspłaciŭšysia.
Jak raskazaŭ adzin z rabotnikaŭ bienzakałonki, pa kamierach źniešniaha nazirańnia było vidać, što mašyna ruchałasia całkam narmalna, ale ŭ jaho źjaviŭsia sumnieŭ paśla taho, jak adzin z pasažyraŭ vyjšaŭ dla taho, kab zapravić aŭtamabil.
«Jon akazaŭsia karatyšam — jaho hałava amal nie dastavała da akna ŭ mašynie», — raspavioŭ jon.
Uviečary taho ž dnia palicejskija zaŭvažyli skradzienuju mašynu na darozie kala Hraftana i pahnalisia za joj. Pieraśled spynili, kali stała zrazumieła, što za rulom siadzić padletak i što pahonia moža stać niebiaśpiečnaj dla žyćcia.
Nieŭzabavie aŭtamabil byŭ znojdzieny na abočynie darohi ŭ Hraftanie. Dzieci zamknulisia znutry, i palicejskim pryjšłosia dubinkaj raźbić akno, kab adkryć dźviery.
Pa słovach palicejskich, padletki, chutčej za ŭsio, mianialisia miescami za rulom, bo prajechać amal tysiaču kiłamietraŭ dla adnaho padletka davoli składana.
U palicyi skazali, što dapytajuć dziaciej paśla taho, jak tudy prybuduć ich baćki.
