Siarhiej Marcaleŭ u 2010 hodzie byŭ kiraŭnikom pieradvybarčaha štaba kandydata ŭ prezidenty Mikałaja Statkieviča. Amal praź dzieviać hadoŭ paśla tych padziejaŭ Marcaleŭ vyrašyŭ apavieści svaju viersiju padziej. U fejsbuku jon apublikavaŭ užo dźvie častki ŭspaminaŭ (1 i 2).
Siarhiej Marcaleŭ. Fota svaboda.org.
Marcaleŭ piša pra toje, što adbyvałasia za paru dzion da Płoščy, a taksama pra ŭłasna dzień 19 śniežnia. Za dzień da Płoščy Statkieviča vyrašyli schavać u «vielmi-vielmi sakretnym miescy». Marcaleŭ sam iranizuje z taho, što rabiłasia. Bo schavali dzie? U kvatery kiraŭnika štaba.
Na šeść viečara 19 śniežnia ŭ Statkieviča była zapłanavanaja sustreča z Uładzimiram Niaklajevym u pryvatnaj kvatery. Kandydat razam z Marcalevym pryjechali svoječasova, ale nijakaha Niaklajeva tam nie było.
«Nas upuściła niemaładaja ŭschvalavanaja žančyna ŭ chałacie. Ja da hetaha času nie viedaju, chto heta: byłaja žonka abo siastra Niaklajeva. «Z Vałodziem usio budzie dobra, praŭda?» — z tryvohaj zapytałasia jana. Statkievič uśmichnuŭsia tak, jak umieje ŭśmichacca tolki žančynam. «Usio budzie dobra», — skazaŭ jon. Navat ja jamu pavieryŭ», — piša Marcaleŭ.
Čas išoŭ, ale Niaklajeŭ tak i nie źjaŭlaŭsia. «Nabiraju Dźmitryjeva. Darečy, u jaho byŭ numar telefona z tryma šaściorkami, i jon strašna hanaryŭsia svajoj abrevijaturaj AD. Časam takija štrychi skažuć bolš, čym kniha».
Mienavita Dźmitryjeŭ skazaŭ, što sustreča adbudziecca ŭ inšym miescy. Praź niejki čas za Statkievičam i Marcalevym pryjechaŭ «Leksus» z kiroŭcam Dźmitryjeva». Pryvieźli na Kalektarnuju, 42. Ofis «Havary praŭdu». «Heta była pastka», — ličyć Marcaleŭ.
«Niaklajeŭ, zdavałasia, całkam byŭ padaŭleny i nijakich pieramovaŭ nie płanavaŭ. Jon miechanična apranaŭ čyrvony łyžny kambiniezon i… maŭčaŭ. «Hadzina maŭčańnia» — ja tak nazvaŭ hetuju dziŭnuju situacyju. Mikałaj Statkievič prykmietna złavaŭ, i jamu drenna ŭdavałasia heta chavać», — piša Marcaleŭ.
Sprava ŭ tym, što pieršapačatkova Statkievič musiŭ iści na Płošču z boku čyhunačnaha vakzała z kałonaj, jakuju vioŭ Pavieł Sieviaryniec, ale praz hety incydent zastaŭsia na Kalektarnaj. Kałona «Havary praŭdu» rušyła ŭ bok Niamihi, kali im darohu pieraharadzili milicejskija aŭto.
«Kiraŭnik słužby biaśpieki kandydata Niaklajeva schapiŭsia za bort milicejskaha aŭto jak vaviorka za šyšku. Jon byŭ pieršy. Tolki potym dałučylisia astatnija. Mnie składana havaryć i dumać drenna pra hetaha čałavieka, šmat hadoŭ ź im znajomy. Ale heta jon daŭ sihnał da ataki», — piša Marcaleŭ.
U kamientarach Jarasłaŭ Biernikovič, jašče adzin z udzielnikaŭ taho šeścia, patłumačyŭ, što havorka pra Aleha Miacielicu. Paśla Płoščy jon uciače ŭ Litvu, ale potym vierniecca nazad u Biełaruś.
Biernikovič jašče źviarnuŭ uvahu na detal, što čyrvonyja kurtki apranuli Niaklajeŭ, Dźmitryjeŭ i Miacielica.
U vyniku byŭ źbity da nieprytomnaha stanu Uładzimir Niaklajeŭ. Statkievič byŭ mocna źbity, ale ŭsio ž dajšoŭ da Płoščy.
Marcaleŭ piša, što było jasna: pravieści akcyju na Kastryčnickaj płoščy nichto nie dazvolić, bo tam byŭ zality katok, maroz, a jašče mocna hrała rasijskaja papsa, tamu było pryniataje rašeńnie sychodzić adtul.
«Možna było pajści ŭ Alaksandraŭski skvier da Administracyi prezidenta. Niaŭdały scenar. Kałona nie paśpieje raściahnucca i nabrać krytyčnuju masu, vułačka hetaja — vuzki apiendyks, dzie pratestoŭcy stanuć lohkaj zdabyčaj miasa ŭ pahonach. Kiraŭnik, isteryčny i bajaźlivy, uspryniaŭ by jak asabisty vyklik — i Słužba biaśpieki prezidenta achvotna rasstralała b biazzbrojnych demanstrantaŭ», — vykazvaje zdahadku Marcaleŭ. Nie pajšli da BT, bo daloka — i tracina prosta b nie dajšła.
Čamu było tak šmat kandydataŭ? «Svaju viersiju «adzinaha kandydata» prapanavaŭ Uładzimir Prakopavič Niaklajeŭ. Pavodle jaho słoŭ, jon staŭ hałoŭnym razdatčykam załatoha zapasu. Prapanoŭvaŭ źniacca kaleham za chabar. Dalej infarmacyja miortvaja. Statkievič vietliva admoviŭsia. Ale, jak minimum, adzin konik paeta kinuŭ — hrošy ŭziaŭ, ale nie źniaŭsia. Paśla akazałasia, što jon i pa žyćci łajno. Ja nie pra paeta». U 2010 hodzie chadzili čutki, što tak zrabiŭ kandydat ad AHP.
Cikava, što Marcaleŭ pralivaje śviatło na zvanok Statkieviču Alaksandra Smancara, biznesoŭca, jaki žyvie va Ukrainie. Mienavita Smancar tady kazaŭ kandydatu, kab jon zajmaŭ miesca Sidorskaha [tahačasny premjer-ministr] i naciskaŭ na knopki.
«Na telefonnym zapisie HB čuvać, što Smancar vidavočna niećviarozy i sprabuje zrabić uražańnie na sabutelnikaŭ: «Kola, zachodź, siadaj u kresła Sidorskaha, naciskaj na knopku!». Statkievič ničoha na hetuju niedarečnaść nie adkazvaje, spasyłajučysia na drennuju čutnaść», — adznačaje Marcaleŭ. Jon pierakonvaje, što Smancar nie pieravodziŭ na vybarčuju kampaniju Statkieviča ni kapiejki.
Kali ŭžo adbyŭsia razhon, to Statkievič telefanavaŭ Marcalevu z prośbaj pakłapacicca pra hierb «Kaścieša», ź jakim kandydat pryjšoŭ na Płošču. Ale hierb usio ž zhubili.
«Apierupaŭnavažany vajskovaj kontrvyviedki chodzić pa dopytnaj. «Vy vinavatyja. Vy i tolki vy. «Havary praŭdu» abaznačyła siabie tryma čyrvonymi kurtkami. Statkievič — familnym hierbam. Vaš bajec jaho straciŭ. Vy stracili ściah pałka. Padpałkoŭnik rasstralaŭ by vas na poli boju. Apuskaju hałavu. Čekist maje racyju. Choć i damahajecca svaich metaŭ. My stracili hierb Mikałaja Viktaraviča», — adznačaje Siarhiej Marcaleŭ.
Jon abiacaje jašče dźvie častki ŭspaminaŭ pra tyja padziei.
