Złata Savostava, jakaja najechała na aktyvista Leanida Kułakova kala restarana «Pojediem pojedim», nijakaj adkaznaści nie paniesła. Usie hrošy zapłacić jaje maci Śviatłana, paviedamlaje radyjo «Svaboda».
Incydent adbyŭsia 27 červienia 2018 hodu. 29-hadovaja Złata Savostava na aŭtamabili «Tajota» na vialikaj chutkaści najechała na Leanida Kułakova i źjechała ź miesca zdareńnia, nia vyklikaŭšy ni chutkuju dapamohu, ni DAI. Lekary 6-ha špitala paćvierdzili, što ŭ Kułakova była złamanaja ruka. Ale sudova-medycynskaja ekspertyza pierałom admaŭlaje.
29-hadovaja Złata Savostava, jakaja najechała na pratestoŭcaŭ u Kurapatach, raskazała svaju viersiju padziej
30 lipienia sud Pieršamajskaha rajonu stalicy vynies rašeńnie: maci Złaty Savostavaj, uładalnica «Tajoty» Śviatłana Savostava pavinna apłacić Leanidu Kułakovu maralnuju škodu ŭ sumie 500 rubloŭ, jašče 34 rubli za praviadzieńnie ekspertyzy i 76 rubloŭ sudovych vydatkaŭ.
Na zaklučnaje sudovaje pasiedžańnie pazvanaja Złata Savostava nie źjaviłasia, jaje intaresy ŭ sudzie pradstaŭlajuć babka Nadzieja i maci Śviatłana Savostava. Maci padčas najezdu była ŭ aŭtamabili na pasažyrskim siadzieńni.
Kułakoŭ raskazaŭ, što 7 tydniaŭ chadziŭ z hipsam, ruka pastajanna baleła, ad bolu jon nia moh spać, ničoha rabić. Jon žyvie adzin, tamu było ciažka siabie absłuhoŭvać. Paśla taho, jak źniali hips, ruka praciahvała baleć, ciapier jana nie zhinajecca, pastajanna balić u łokcievym sustavie. Jon źbiraŭ hrošy na ekspertyzy, mieŭ šmat vydatkaŭ, tamu i aceńvaje svaje maralnyja i fizyčnyja pakuty ŭ 120 tysiač rubloŭ.
Leanid Kułakoŭ padkreśliŭ, što najezd byŭ nie vypadkovym, a naŭmysnym, najechali na jaho «sa śmiecham». Patłumačyŭ, čamu nie pracuje z 2017 hodu: jaho zvolnili sa słužby taksi, kali jon byŭ zatrymany za ŭdzieł u Dni Voli. Ciapier nia moža ŭładkavacca navat vartaŭnikom ci hruzčykam.
Nadzieja Savostava miarkuje, što Kułakoŭ pierabolšvaje svaje pakuty i bol i tolki vymahaje hrošy.
«Spačatku Kułakoŭ patrabavaŭ 60 tysiač dalaraŭ kampensacyi, potym — 6 tysiač. Jon nie pracuje ŭ 56 hadoŭ nie tamu, što nia moža ŭładkavacca, a tamu, što nia choča, u jaho taki ład žyćcia. Moža pracavać vartaŭnikom z takoj traŭmaj. Kułakova pastajanna pakazvajuć na «Biełsacie», jak zorku, jak achviaru», — kaža babula Złaty.
Nadzieja Savostava nia ŭtojvała emocyj i zajaviła, što meta ŭ Kułakova — atrymać invalidnaść i spahnać hrošy ź jaje ŭnučki.
«Heta vidavočna. Ekspertyzy paćviardžajuć, što nie było ni najezdu, ni pierałomaŭ. Złata była šakavanaja — jana bačyła taki kašmar! U jaje na nervovaj hlebie dahetul voka torhajecca. Złata dziaŭčyna vychavanaja i adukavanaja, u jaje dźvie zamiežnyja adukacyi. A Kułakoŭ — aferyst. Jak možna tak žyć? Jana publična paprasiła prabačeńnia ŭ sudzie pierad Kułakovym», — kaža babula Savostavaj.
Śviatłana Savostava zajaviła, što jana nie zaŭvažyła, jak aŭtamabil najechaŭ na Kułakova, i daviedałasia pra heta ŭžo kala doma, kali mašynu spyniła DAI. Jana taksama adznačyła, što prasiła prabačeńnia ŭ Kułakova i sprabavała damovicca, ale biezvynikova.
Ad 1 červienia 2018 hodu aktyvisty niasuć vartu kala miesca zabojstva i pachavańnia dziasiatkaŭ tysiač achviaraŭ stalinskich represij u Kurapatach. Jany pratestujuć suprać pabudovy i pracy ŭ miescy represij zabaŭlalnaha kompleksu «Pajedziem pajadzim».
