Niekalki hadzin tamu ŭ Klecku zahinuŭ Alaksiej Šklanik, jaki prachodziŭ alternatyŭnuju słužbu ŭ miascovaj ŽKH, paviedamlaje błohier Nexta. Hetuju infarmacyju paćvierdzili «Našaj Nivie» u miascovym rajvykankamie i MUS.
Mahčymaść alternatyŭnaj słužby zakanadaŭča praduhledžana dla chłopcaŭ, jakija pa relihijnych pierakanańniach nie mohuć prymać vajskovuju prysiahu i nasić zbroju
— Jany słužyli tam razam z bratam-bliźniukom, — raskazała znajomaja ź situacyjaj krynica błohiera. — U toj dzień ich prymusili prybirać piasok na darozie. U hety čas pa joj prajazdžaŭ śmiećciavoz toj ža arhanizacyi. Kiroŭca adciahnuŭsia na toje, kab pamachać rukoj niejkamu znajomamu, i najechaŭ na Alaksieja zadnimi kołami. Usio heta adbyłosia na vačach u jaho brata.
Z kiroŭcam śmiećciavoza pravodziacca śledčyja dziejańni, pryznačany šerah ekśpiertyz. Ustanoŭlena, što zahinuły i jaho brat pryjšli na alternatyŭnuju słužbu z horada Lachavičy Bresckaj vobłaści.
Raźmiarkoŭvaje dla prachodžańnia alternatyŭnaj słužby ministerstva pracy. Tak uradženiec Lachavič i trapiŭ u Kleckuju ŽKH.
Načalnica ŭpraŭleńnia pracy i sacabarony Kleckaha rajvykankama Ałła Mialuk paćvierdziła «Našaj Nivie» fakt zdareńnia.
Chłopca zvali Alaksiej Šklanik, jon sapraŭdy prachodziŭ alternatyŭnuju vajskovuju słužbu razam z bratam-bliźniukom.
Zahinułamu było 22 hady. Pa fakcie zdareńnia viadziecca śledstva.
Paźniej padrabiaznaści DTZ paviedamiła i milicyja. Za rulom śmiećciavoza MAZ znachodziŭsia 43-hadovy kiroŭca. Pry pavarocie naprava z vulicy Pijanierskaj na vulicu Pieršamajskuju jon ździejśniŭ najezd zadnim pravym kołam na chłopca, jaki zajmaŭsia ŭborkaj častki darohi kala tratuara.
Małady čałaviek ad atrymanych traŭmaŭ pamior na miescy DTZ.
Zaviali kryminalnuju spravu pa č.2 art. 317 Kryminalnaha kodeksa (parušeńnie pravił darožnaha ruchu abo ekspłuatacyi transpartnych srodkaŭ). Maksimalnaje pakarańnie pa hetaj častcy artykuła praduhledžana ŭ vyhladzie pazbaŭleńnia voli na termin da 5 hadoŭ.
Minabarony nie niasie adkaznaści za tych, chto prachodzić alternatyŭnuju słužbu, bo jany nie vajskoŭcy. Pracaŭładkavańniem i inšymi pytańniami «alternatyŭščykaŭ» zajmajucca kuratary ŭpraŭleńniaŭ pracy i sacyjalnaj abarony miascovych harvykankamaŭ.
