Ministerstva adukacyi trymaje na kantroli, jak škoły vykonvajuć sanitarnyja normy, u tym liku ŭ častcy damašnich zadańniaŭ. Pra heta BiełTA paviedamiła namieśnik načalnika ŭpraŭleńnia ahulnaj siaredniaj adukacyi Iryna Karžova.
Śpiecyjalist adznačyła, što Minadukacyi źviartaje asablivuju ŭvahu na praduchileńnie pierahruzki vučniaŭ, zachavańnie sanitarnych normaŭ i praviłaŭ u častcy abjomu damašniaha zadańnia pa kožnym pradmiecie. «U svaich instruktyŭnych listach da pačatku navučalnaha hoda Minadukacyi akcentavała ŭvahu na hetym pytańni. Funkcyja administracyi ŭstanovy adukacyi — zabiaśpiečyć niaŭchilnaje vykanańnie patrabavańniaŭ SanPiN», — skazała Iryna Karžova. Viedamstva pravodzić manitorynh, jak u škołach vykonvajuć hetyja patrabavańni. Analiz pakazvaje, što pytańnie znachodzicca na kantroli administracyj, dadała jana.
«Uvieś składany, novy materyjał nastaŭnik pavinien rastłumačyć padčas uroka. Damašniaje zadańnie pryznačana dla zamacavańnia i paŭtareńnia materyjału, jaki byŭ projdzieny ŭ škole», - nahadała pradstaŭnik Minadukacyi.
Pa sanitarnych normach na vykanańnie damašniaha zadańnia ŭ druhim kłasie advodzicca da 1,2 hadziny, u trecim-čaćviortym - 1,5 hadziny. U piaci-i šaścikłaśnikaŭ pavinna sychodzić dźvie hadziny. U siomych i vośmych kłasach na heta advodzicca 2,5 hadziny. Dla staršakłaśnikaŭ norma — try hadziny. Pieršakłaśnikam damašnija zadańni nie pavinny zadavacca na praciahu ŭsiaho navučalnaha hoda.
Jak paviedamlałasia, 26 žniŭnia Alaksandr Łukašenka, prymajučy z dakładam ministra adukacyi Ihara Karpienki, źviarnuŭ uvahu na niedapuščalnaść zanadta vialikaj nahruzki na dziaciej u škołach, asabliva damašnimi zadańniami.
