Najlepšyja šmatsieryjnyja stužki, jakija možna ŭbačyć u pieršym miesiacy vosieni. U našym śpisie buduć jak premjery, hetak i sieryjały, jakija viartajucca ŭ efir paśla pierapynku.
«Dvojka» (The Deuce)
Histaryčnaja drama. ZŠA, 3-i siezon
Dvojka — heta rajon Ńju-Jorka na Manchetenie, viadomy svaimi zabavami: prastytutki, pornateatry, narkotyki, bary. Hety sieryjał pieranosić u dzivosny śviet Ńju-Jorka 1970-ch. U centry siužeta — uzdym industryi porna. Kali jašče ŭ pačatku sieryjała jana znachodzicca ŭ zusim zarodkavym stanie, to z časam heta stanovicca mahutnym biznesam. Pačynajecca ŭsio z kabinak, dzie za paru dalaraŭ možna było hladzieć samyja roznyja seksualnyja scenki, a skančvajecca pyšnymi prezientacyjami novych filmaŭ dla darosłych u kinateatrach.
Heta śviet ZŠA da ŚNIDu, kali ŭsie jašče nie tak bajalisia vypadkovaha nieabaronienaha seksu. Žyćcio prastytutak, jakija z časam pierabirajucca z vulic u bardeli. Pradažnaść i sumlennaść ńju-jorkskaj palicyi. Razborki bandaŭ: irłandskich, italjanskich, jaŭrejskich. Kali chočacca pahruzicca ŭ toj čas, to lepšaha sieryjała ciažka znajści.
«Mistar Miersiedes» (Mr. Mercedes)
Detektyŭ. ZŠA, 3-i siezon
Styvien Kinh — heta nie tolki karol žachaŭ, ale i vielmi dobry detektyŭščyk. «Mister Miersiedes» — sieryjał, źniaty pavodle jaho 62-ha ramana. U centry stužki — adstaŭny aficer palicyi Bił Chodžas. U jaho absalutna nievynosny charaktar, prablemy z vypiŭkaj, jon nieachajny i nie duža sočyć za svaim charčavańniem. Zatoje kožny jaho ranak pačynajecca z taho, što jon kormić kapustaj čarapachu.
I choć Chodžes syšoŭ na piensiju, jamu nie daje spakoju adna sprava. Nieviadomy skraŭ miersiedes, na jakim urazajecca ŭ natoŭp, zabivajučy šasnaccać ludziej. Zabojca ŭdała chavajecca, ale jamu chočacca pryznańnia, tamu jon kidaje vyklik Chodžesu. Što za ludzi, jakija zdolnyja pajści na takija zabojstvy, jaki ichni partret, što za hetym staić? U «Mistary Miersiedesie» šmat adkazaŭ na hetyja pytańni.
«Amierykanskaja historyja žachaŭ» (American Horror Story)
Žachi, zvyšnaturalnaje. ZŠA, 9-y siezon
Heta antałohija samych zahadkavych i nievytłumačalnych historyj, jakija adbyvalisia ci mahli adbyvacca ŭ historyi ZŠA. Kožny siezon razhortvajecca ŭ novym miescy i ŭ inšym časie. Naprykład, pačynajecca sieryjał u Łos-Andželesie ŭ 2011 hodzie, druhi siezon užo pieranosicca ŭ Masačusiets uzoru 1964 hoda. Jość ceły siezon, pryśviečany Trampu, a dakładniej toj składanaj psichałahičnaj atmaśfiery, jakaja papiaredničała vybaram i pieršym miesiacam paśla ich.
Novy siezon nazyvajecca «1984», ale nie treba tut šukać Orueła. Dziejańnie adbyvajecca ŭ letnim łahiery Redvud, kudy pryjazdžajuć siabry z Łos-Andželesa. Kaniečnie, buduć strašnyja historyja la vohnišča. Ale sapraŭdy žach pačynajecca, kali ŭ łahiery źjaŭlajecca zabojca ŭ mascy, što ŭciok z varjatni.
«Dobry doktar» (The Good Doctor)
Miedycynskaja drama. ZŠA, 3-i siezon
Pamiatajecie doktara Chaŭsa? Tak? Ciapier zabudźcie, bo «Dobry doktar» — heta poŭnaja procilehłaść Chaŭsu. Kaniečnie, tut taksama budzie šmat miedycynskich zahadak i ŭnikalnych vypadkaŭ, jakija buduć chutčej nahadvać dobry detektyŭ. A hałoŭny hieroj, nibyta Šerłak Chołms, budzie šukać dokazy i raskryvać spravu.
Šon Miorfi — nadzvyčaj talenavity doktar, jaki pierajazdžaje ŭ San-Chase z pravincyjnaha Vajominha. Jahonym viedam i niestandartnym rašeńniam moža pazajzdrościć luby śpiecyjalist sa stažam. Jość tolki adna, ale zusim nie drobnaja akaličnaść. U Šona Miorfi aŭtyzm, i heta zaminaje mnohim abjektyŭna pahladzieć na jahonyja zdolnaści.
«Nievierahodnaje» (Unbelievable)
Detektyŭ. ZŠA, 1-y siezon
Dziaŭčynka-padletak Mary Adler źviartajecca ŭ palicyju z zajavaj, što jaje zhvałtavali. Jana ŭmolvaje, kab padonka aryštavali i pakarali. Joj kažuć, što hetaja historyja zusim niepraŭdapadobnaja i niedarečnaja. Na nastupny dzień jana ŭžo zabiraje svaju zajavu. Adnak dva detektyvy ŭsio ž biarucca za rasśledvańnie spravaŭ sa zhvałtavańniami, jany vychodziać na sieryjnaha złačyncu. Sieryjał zasnavany na realnych padziejach.
Hladzi taksama: Piać sieryjałaŭ, jakija varta pahladzieć u žniŭni
