Fota Nadziei Bužan.
U Biełarusi aptymizavali patrabavańni da raskładu i režymu navučalnych zaniatkaŭ va ŭstanovach ahulnaj siaredniaj adukacyi.
Adpaviednuju infarmacyju raźmiaściła Ministerstva achovy zdaroŭja na svaim sajcie, rastłumačvajučy normy pastanovy Saŭmina ad 7 žniŭnia 2019 hoda numar 525 «Ab zaćviardžeńni śpiecyfičnych sanitarna-epidemijałahičnych patrabavańniaŭ da ŭtrymańnia i ekspłuatacyi ŭstanoŭ adukacyi», paviedamlaje BIEŁTA.
U pryvatnaści, aptymizavany patrabavańni da raskładu i režymu navučalnych zaniatkaŭ va ŭstanovach ahulnaj siaredniaj adukacyi.
Tak, vyklučana patrabavańnie ab čarhavańni ciažkich i lohkich navučalnych pradmietaŭ, dazvolena praviadzieńnie kantrolnych rabot u paniadziełak, zdvajeńnie urokaŭ pa fizkultury dla vučniaŭ starejšych za 18 hadoŭ, skaročana praciahłaść pieraźmienki, dapuščana praviadzieńnie fakultatyŭnych urokaŭ pierad pačatkam navučalnych zaniatkaŭ, kali jany pačynajucca ŭ 9.00.
U płanie charčavańnia dziaciej vyznačany asnoŭnyja patrabavańni pa papiaredžańni hrupavoj zachvaralnaści na vostryja kišečnyja infiekcyi.
Vyklučany zališnija patrabavańni da adboru sutačnych prob, technałohii pryhatavańnia asobnych straŭ, ich rekamiendavanyja abjomy i inš. Ustanoŭleny ahulnyja patrabavańni da racyjonu charčavańnia navučencaŭ, u tym liku va ŭstanovach vyšejšaj adukacyi. Patrabavańni da racyjonu dziaciej aptymizavany dla zachavańnia pryncypaŭ dziciačaj dyjetetyki, zabieśpiačeńnia zbałansavanym pa charčovych rečyvach i enierhii charčavańniem.
Dadatkova vyznačana abaviazkovaść arhanizacyi navučalnych zaniatkaŭ pa 6-dzionnym (a nie pa 5-dzionnym) navučalnym tydni ŭ niaprofilnych 10—11 kłasach (u jakich z 2018/2019 navučalnaha hoda ŭviedziena prafiesijnaje pracoŭnaje navučańnie ŭ kolkaści 6 navučalnych hadzin na tydzień).
Uniesieny patrabavańni da ŭmoŭ i režymu zaniatkaŭ z vykarystańniem navučalna-vyličalnaj techniki. Va ŭstanovach dla darosłych vyznačana praciahłaść navučalnaha zaniatku (45 minut). Va ŭstanovach vyšejšaj adukacyi rehłamientavana vučebnaja nahruzka dla studentaŭ pieršaha i druhoha kursaŭ dzionnaj formy navučańnia, ustanoŭlena minimalnaja praciahłaść pierapynkaŭ, vyznačany patrabavańni da praviadzieńnia kantrolnych rabot. Pa ŭstanovach dadatkovaj adukacyi dla dziaciej i moładzi vyklučany patrabavańni adnosna vyznačeńnia ŭzrostu pačatku zaniatkaŭ u abjadnańniach pa intaresach i inš.
Adpaviednyja źmianieńni buduć uniesieny ŭ sanitarnyja normy i praviły. Da hetaha patrabavańni sanitarnych norm, jakija supiarečać pastanovie, vykonvacca nie pavinny.
Pastanova Saŭmina padrychtavana Ministerstvam achovy zdaroŭja na padstavie dekreta numar 7 ad 23 listapada 2017 hoda «Ab raźvićci pradprymalnictva». Śpiecyfičnyja sanitarna-epidemijałahičnyja patrabavańni raspaŭsiudžvajucca na ŭstanovy adukacyi niezaležna ad form ułasnaści i viedamasnaj prynaležnaści.
