Fota Nadziei Bužan
U Biełarusi budzie ŭviedziena ŭsieahulnaja siaredniaja adukacyja. Pra heta paviedamiŭ ministr Ihar Karpienka u prahramie «Kontury» na ANT, piša Tut.by.
Pa słovach Karpienki, takaja norma ŭtrymlivajecca ŭ novaj redakcyi Kodeksa ab adukacyi. Dakumient pavinien budzie razhledzieć novy parłamient.
«My ŭ kodeks zakłali normu pra abaviazkovaść ahulnaj siaredniaj adukacyi. Ciapier u nas bazavaja adukacyja, h.zn. 9 kłasaŭ abaviazkovyja. A my pierachodzim na ŭsieahulnuju siaredniuju adukacyju, 11 kłasaŭ abaviazkova. I heta, viadoma ž, ciahnie za saboj kompleks tych mier, jakija budzie pradprymać dziaržava dla taho, kab małady čałaviek mieŭ mahčymaść sacyjalizacyi srodkami adukacyi dla vychadu ŭ samastojnaje žyćcio, u pracoŭnuju dziejnaść», — skazaŭ Karpienka.
Pierachod na ŭsieahulnuju siaredniuju adukacyju abmiarkoŭvajecca ŭ krainie voś užo dva hady. U 2017 hodzie ministr zajaviŭ, što sistema adukacyi faktyčna hatovaja da takoha pierachodu. U krainie vybudavana dakładnaja sistema, u ramkach jakoj hramadzianie mohuć atrymlivać ahulnuju siaredniuju adukacyju — «praź sistemu škoł, himnazij, licejaŭ, praz prafiesijna-techničnuju i siaredniuju śpiecyjalnuju adukacyju», udakładniŭ Ihar Karpienka.
