Fota Nadziei Bužan.
Paśla taho, jak «Naša Niva» paviedamiła, što Anton Matolka i Pavieł Biełavus admovilisia iści na parłamienckija vybary, stała prylatać šmat pytańniaŭ: «Čamu vy admovilisia?». Niekatoryja praciahvajuć nastojliva pytacca ŭ ich, tamu ja adkažu tut publična.
Pa praŭdzie kažučy, ja čałaviek absalutna nie idealny, lublu trolić, časam nakidvać (kali sumna), adčuvaju siabie kamfortna ŭ kanflikcie i h.d. Ale čaho ja imknusia paźbiahać jak maha bolš, dyk heta adkrytaj, śviadomaj chłuśni i zornaj chvaroby. U 2006 hodzie ja razdaŭ dziasiatki tysiač listovak svaim siabram i ščyra zrabiŭ heta. U 2010-m ledź nie atrymaŭ dubinkaj pa hałavie, bo ščyra vieryŭ u pramovy palitykaŭ, jakija stajali za imi. U 2011-m na nas ź Viktoryjaj Palčys zakončylisia miescy ŭ aŭtazaku, nas nie zatrymali, paśla čaho ja sumlenna nasiŭ pieradački tym, kamu pašancavała mienš.
Ale ja nie ŭjaŭlaju, jak možna ščyra pisać vam 5 hadoŭ pra falsifikacyi i adsutnaść sumlennych vybaraŭ u krainie, a zatym u adzin dzień zapilić post z pafasnymi frazami abo pačać tranślavać łozunhi ŭ styli: «Pieramoha budzie za mnoj!».
Ja nie ŭjaŭlaju, jak možna ščyra kazać pra mahčymaść być abranym kudyści tam, kali sam viedaju, što navat ubohija prazrystyja skryni ŭłada nie chacieła stavić 15 hadoŭ. Što ŭžo kazać pra narmalny padlik hałasoŭ, veb-kamiery i daterminovaje hałasavańnie.
Ja nie ŭjaŭlaju, jak možna ščyra kazać: «Vybary falsifikujuć, ale ja chaču danieści alternatyŭnaje bačańnie!», — kali viedaju, što ciapier lepš za ŭsio danosić alternatyŭnaje mierkavańnie dobrym virusnym jakasnym kantentam. A nie pikietam z raściažkaj abo 2000 ulotak pa paštovych skryniach.
Ja nie viedaju, jak možna ščyra havaryć, što ja adstojvaju čyjeści intaresy, kali ja nie student, maci-328, brescki aktyvist suprać zavoda AKB i h.d. Ich vybarčyja kampanii jašče možna zrazumieć, pryniać i dzieści navat padtrymać.
Nu i dakładna nikoli nie šukaŭ pijaru ci lišniaj uvahi, kab adčuć siabie bol ščaślivym i krutym. Tamu voś čym płanuju zaniacca hetaj vosieńniu:
— Źjeździć u subotu ŭ rodnuju Lidu na adkryćcio pomnika Hiedyminu. Hety pomnik prabivaŭsia hadoŭ 20, napeŭna. Histaryčnaja krutaja padzieja, na jakuju kliču i vas.
— Mianie ščyra cikavić vynik pierapisu-2019, jaki projdzie ŭ kastryčniku. Za apošnija hady ŭ mianie ŭ kamientarach atabaryłasia stolki zmaharoŭ za biełaruskuju movu, jakija rvali na sabie kašulu za rodnuju movu. Ale nadyšoŭ čas, i nichto narmalnaj maštabnaj kampanii ŭ jaje padtrymku padčas pierapisu tak i nie padrychtavaŭ.
— Nie chaču zabyvać pra Kurapaty, a «Noč rasstralanych paetaŭ» najlepšy dla hetaha sposab.
— Ja budu zajmacca tym, kab biełarusy byli hodna pradstaŭlenyja ŭ Vilni na pierapachavańni Kalinoŭskaha.
— Mnie cikava, što budzie sa studentami, i nie chočacca, kab jany źjazdžali ź Biełarusi nazaŭsiody z-za durnych dziejańniaŭ uładaŭ i Ministerstva abarony.
— Cikava stvarać cikavy kantent u surovuju asieńnie-zimovuju paru, pakul vy sumujecie doma.Tak što prabačcie tyja, kaho rasčaravaŭ, pramianiaŭšy harantavanaje miesca ŭ parłamiencie na ŭsiakaje hłupstva. Ludzi niedaskanałyja, što zrobiš.
