Rasijskaja hazieta «Kamiersant» daviedałasia płany intehracyi Biełarusi i Rasii. Pavodle infarmacyi ich žurnalistaŭ, Rasija dabivajecca ekanamičnaha pahłynańnia našaj krainy, a ŭ 2022 hodzie moža być utvoranaja kanfiederatyŭnaja dziaržava. Jak u hetaj situacyi musić dziejničać niezaležnaje hramadstva? Pra heta «Naša Niva» spytała ŭ byłoha palitviaźnia, eks-kandydata na pasadu prezidenta Mikałaja Statkieviča.
«Pahroza dla bolšaści ludziej nievidavočnaja, bo farmalnyja atrybuty niezaležnaści zastajucca, a tam niejkija banki, kodeksy… Ludzi mohuć padumać, što ŭ nas zarobki buduć, jak u Rasii, niechta padumaje, što kryminalny kodeks stanie bolš miakkim.
A na spravie my atrymajem ekanamičnaje pahłynańnie Biełarusi. I heta prapanova zaćvierdžanaja na ŭzroŭni ŭradaŭ. Pa sutnaści, Łukašenka pradaje Biełaruś za mahčymaść zastavacca pry ŭładzie.
Adzinaje, što tam niajasna — heta ŭłasna toj punkt, z čaho ŭsio i pačałosia. Heta ceny na rasijski vuhlavadarod i dostup da rasijskich rynkaŭ dla našych praduktaŭ. Dostup, jasnaja sprava, budzie zabiaśpiečany, a voś z cenami — składanaje pytańnie. Ale z dostupam na rynki jość i inšy bok — heta dostup rasijskaj pradukcyi na biełaruski rynak. Užo siońnia biełaruskija cukrovyja pramysłoŭcy ŭ ciažkoj situacyi, bo rasijski cukar dajšoŭ da biełaruskich palic, i jon značna tańniejšy.
I heta budzie praciahvacca ŭ inšych śfierach. Chaj i ŭ zvyrodlivaj formie, ale kapitalizm u Rasii raźvity našmat bolš, čym u nas. I heta adbivajecca na jakaści pradukcyi. Chaj rasijskaja pradukcyja nie moža kankuravać za miežami Jeŭrazijskaha sajuza, ale tut jana zmoža pakłaści biełaruskuju pramysłovaść na łapatki.
Situacyja vielmi niebiaśpiečnaja. Paŭtarusia, što jana niebiaśpiečnaja ŭ svajoj niajaŭnaści. Łukašenku patrebnyja hrošy na ŭtrymańnie svaich 200 tysiač pravaachoŭnikaŭ, na dziaržaŭnyja zavody.
A za heta my zapłacim tym, što staniem ekanamičnaj kałonijaj Rasii. Kali tak zdarycca, potym dla Rasii budzie spravaj techniki adchilić jaho ad ułady. I pieršy abrany ŭ takoj situacyi parłamient, navat kali tam buduć ličyć hałasy, prahałasuje za likvidacyju i farmalnych atrybutaŭ niezaležnaści.
Maja prapanova da ŭsich patryjatyčnych siłaŭ. «Narodnaja hramada» vyłučyła 38 kandydataŭ na parłamienckija vybary, zarehistravanyja 36. Ja pravodžu sustrečy z vybarcami ŭ farmacie pikietaŭ pa bujnych haradach krainy. Heta lehalnaja mahčymaść pryjści i publična vykazać svaju niazhodu.
6 kastryčnika a 14-j ja budu pravodzić sustreču ŭ farmacie pikieta na płoščy Svabody ŭ Minsku. Prapanuju skarystać hetuju situacyju i vykazać svaju niazhodu. Bolš nivodnaja arhanizacyja nie skarystoŭvaje hety samy volny etap u palityčnym žyćci. Heta adziny miesiac, kali ŭ lubym miescy horada možna stavić lehalnyja pikiety ŭ abaronu niezaležnaści.
My ŭ Narodnaj Hramadzie adčuvajem, što nam dajuć skarystać hetuju kampaniju i nie tolki tamu, što my dziejničajem całkam u adpaviednaści z zakanadaŭstvam, ale i tamu, što kimści treba pałochać Pucina», — kaža Statkievič.
