Na sustrečy z kiraŭnikom Dziaržvajenprama Ramanam Hałoŭčankam Alaksandr Łukašenka zajaviŭ, što ŭ Biełarusi ŭžo stvorana rakieta siaredniaj dalokaści, a ŭ płanach, maŭlaŭ, jašče bolš mahutnaja zbroja.
Ale možna padumać, što heta ahavorka — nasamreč rakiet siaredniaj dalokaści ŭ Biełarusi niama (siaredniaja dalokaść aznačaje radyus prymianieńnia 1000 — 5500 kiłamietraŭ). Dahetul było viadoma tolki pra raboty pa ŭdaskalvańni rakiet «Pałaneza» i niejkuju zvyštajemnuju raspracoŭcu kryłataj rakiety «Busieł», dalokaść jakoj taksama nie padbirajecca da tysiačy kiłamietraŭ.
«Naša Niva» źviarnułasia ŭ Dziaržvajenpram z prośbaj dapamahčy razabracca ŭ zajavach Łukašenki.
Aficyjny pradstaŭnik DVPK Uładzimir Łaŭraniuk patłumačyŭ, čym moža być vyklikana błytanina.
«Sprava ŭ tym, što niadaŭna my pradstavili adrazu dźvie novyja rakiety. Pieršaja ź ich — heta kancept, — rakieta, jakaja lacić da 500 kiłamietraŭ, jana dla «Pałaneza».
Sam kompleks byŭ pradstaŭleny ŭ 2016 hodzie z rakietaj dalokaściu da 200 kiłamietraŭ, potym było 300 kiłamietraŭ, ciapier pracujem nad 500. Heta nie siaredniaja dalokaść.
Ale jość i jašče adna rakieta, jana akurat siaredniaj dalokaści, ale pa inšaj kłasifikacyi — kłasifikacyi dla zienitnych rakiet. Havorka pra naš komleks «Buk-MB3K» — heta pieraasensavańnie staroha «Buka», jaki stralaŭ saviecka-rasijskimi rakietami.
Ad jaho zastałasia tolki nazva — Biełaruś zamianiła ŭsio: i techničnuju načynku, i šasi, i bajavuju rakietu — jana voś i nazyvajecca 9M-318, pradstaŭlena sioleta, jaje možna było bačyć na paradzie. Dalokaść jaje paražeńnia — da 70 kiłamietraŭ, prytym cel moža lacieć na vyšyni da 25 kiłamietraŭ i na chutkaści da 1350 mietraŭ za siekundu», — patłumačyŭ Łaŭraniuk.
Vajenny ekśpiert Alaksandr Alesin dadaje, što pakul što cykł vytvorčaści rakiet niapoŭny — my zaležym ad Kitaja, jaki robić ćviordapaliŭnyja elemienty, jakija dazvalajuć, hruba kažučy, rakiecie lacieć.
Pry hetym bolšaść techničnaha zabieśpiačeńnia, kantejnier i kołavaja baza — biełaruskija.
«Žadańnie ŭzbroicca tłumačycca roznymi faktarami. U pryvatnaści, Rasija nam sučasnuju zbroju nie pradaje, kab my, imavierna, tak asłabieli, što paprasili ich pryjści da nas sa svajoj vajennaj bazaj. A inšy susied — Polšča, uzbrojvajecca. Jany ŭžo nabyli rakiety «Chiejmars» z dalokaściu da 300 kiłamietraŭ, i avijacyjnyja rakiety. Nakont «bolš mocnaj» zbroi možna padumać, što havorka viałasia pra raspracoŭku našaj kryłataj rakiety. Pra jaje kazali ŭžo daŭno, i ŭvieś hety čas, napeŭna, niejkaja rabota viałasia», — skazaŭ Aleksin.
