43-hadovy błohier i ajcišnik Mikałaj Masłoŭski vyrašyŭ kinuć vyklik «Mis Biełaruś» Maryi Vasilevič. Masłoŭski vyłučyŭsia kandydatam pa Kalvaryjskaj akruzie №104.
Jaho padtrymlivajuć inšyja papularnyja jutub-błohiery: Alaksandr Kabanaŭ, Siarhiej Piatruchin, Arciom Šaparaŭ, Pavieł Śpiryn, Siarhiej Cichanoŭski. Usie jany płanujuć pravieści pikiet la «Karony» na Kalvaryjskaj 26 vieraśnia ad 14 da 22 hadziny.
Chto taki hety Mikałaj Masłoŭski? «Ja prafiesijny ajcišnik, u mianie dźvie vyšejšyja adukacyi: ekanamičnaja (inžynier-ekanamist) — BNTU, i inžynier-prahramist — BDU. Pracavaŭ ekanamistam na zavodzie chaładzilnikaŭ paru hadoŭ, potym syšoŭ na aŭtamatyzacyju bujnoha biznesu: «Hazpram», «Rasnafta», «Rasatam», «Sibnafta»,
šmat-šmat usiakich prajektaŭ. Ja pracavaŭ u EPAM hałoŭnym śpiecyjalistam pa aŭtamatyzacyi. Ja dastatkova kruty ajcišnik. Na hety momant ja indyvidualny pradprymalnik, vyrašyŭ nikudy nie źjazdžać z krainy, chacia mahčymaściaŭ chapaje», — skazaŭ jon «NN».
«U palityku ja palez nie tamu, što chaču być narodnym abrańnikam i chaču rehalij, chacia ŭ mianie vialikija zadumy. Z dapamohaj błohieraŭ vyrašyŭ vykazać pratest suprać našaj pryhažuni narodnaj Maryi Vasilevič.
Patrebna pryciahvać internet, ŚMI, łozunh musić być prykładna taki: «Spakojna, Maša, ja — Masłoŭski, i ty nie budzieš deputatam».
Dla Masłoŭskaha Kalvaryjskaja akruha rodnaja. «My adrazu vyrašyli prakacić Mašu, bo heta nijaki kandydat, jana pačynaje svaju dziejnaść z vykarystoŭvańnia administracyjnaha resursu. Na hety momant sabrana ŭžo 400 podpisaŭ. Ale jak kaža moj siabra Kabanaŭ, navat kali źbiarom 1500 podpisaŭ, to moža «akazacca» 998 sapraŭdnych. Zaŭsiody možna ž nacisnuć na kahości».
Padzialiŭsia imavierny kandydat i svaimi ŭražańniami ad razmovaŭ ź ludźmi. «My ŭžo pahavaryli z 800 ludźmi. Mabyć, sustreli tolki čałaviek 5-6, jakija topiać za hetuju ŭładu, astatnija niezadavolenyja, chočuć pieramien. Pracentaŭ 20% hatovyja stavić podpisy, astatnija bajacca. Čałaviek 15 skazali, što ich paprasili pastavić podpisy za Mašu i jany buduć za jaje hałasavać».
Chto Masłoŭski pavodle svaich palityčnych pierakanańniaŭ? «Ja biespartyjny. Pa pierakanańniach ja libiertaryjaniec. Moj pryncyp — žyvi sam i nie pieraškadžaj inšym. Aktyŭna padtrymlivaju ja bitkojny, zašyfravanyja elektronnyja pošty i mesendžary. Ja vielmi nie lublu, kali dziaržava ŭłazić u asabistaje žyćcio čałavieka. Ja vystupaju za zachavańnie pryvatnaj infarmacyi. Błohieram staŭ paśla maršu darmajedaŭ dva hady tamu, kali ludziej padzialili na dva łahiery».
