Najlepšyja šmatsieryjnyja stužki, jakija možna ŭbačyć u siaredzinie vosieni. U našym śpisie buduć jak premjery, tak i sieryjały, jakija viartajucca ŭ efir paśla pierapynku.
«Mister Robat» (Mr. Robot)
Drama, technatryler. ZŠA, 4-y siezon
Elijat Ałdersan — małady sacyjapat. Jon kibier-inžynier, jaki dniom pracuje na kampaniju pa infarmacyjnaj biaśpiecy, a ŭnačy zajmajecca chakierstvam. Elijat pakutuje ad depresii, paranoi i narkazaležnaści, što ŭvieś čas uskładniaje jahonaje žyćcio.
Hałoŭny hieroj vieryć u teoryju zmovy. Adnojčy, patrapiŭšy ŭ chakierskuju supołku, jon razam z kamandaj sprabuje ŭzłamać usiu sistemu samaj bujnoj karparacyi, dziela vyzvaleńnia ŭsich žycharoŭ ad kredytaŭ i pazyk…
Faktyčna Ałdersan — heta taki supierhieroj našaha času, jaki nie ŭmieje latać i bicca, ale dobra raźbirajecca ŭ technałohijach, z dapamohaj jakich hatovy abaranić inšych. Dla hetaha jamu zusim nie abaviazkova vychodzić z domu i sutykacca sa złom tvar u tvar.
«Chadziačyja mierćviaki» (The Walking Dead)
Zombi-apakalipsis, drama. ZŠA, 10-y siezon
Adzin z samych papularnych sieryjałaŭ sučasnaści padyšoŭ da svajho skančeńnia. U centry sieryjała apovied pra pamočnika šeryfa Ryka Hrajmsa, jaki razam sa svajoj siamjoj zastajecca adnym ź niamnohich, chto vyžyŭ paśla taho, jak z mahił paŭstali mierćviaki. Hrajms razam z hrupaj acalełych padarožničaje ŭ pošukach biaśpiečnaha miesca. Kožny dzień jaho čakajuć novyja vyprabavańni i bałansavańni na miažy žyćcia i śmierci.
«Chadziačyja mierćviaki» nabyli svaju papularnaść praz dynamičnaść i jarkaść siužeta, a taksama praz žorstkaść, jakaja bałansuje na miažy dazvolenaha. Zombi — heta papularny siužet sučasnaj maskultury. I niachaj niekatoryja i miarkujuć, što z kožnym novym siezonam, sieryjał pačynaŭ hniści, usio adno cikava pabačyć, čym ža ŭsio heta narešcie skončycca.
«Halijaf» (Goliath)
Jurydyčnaja drama. ZŠA, 1-y siezon
Hałoŭny hieroj — advakat-niaŭdačnik Bili Makbrajd. Kaliści jon byŭ suzasnavalnikam bujnoj advakackaj kantory, ale ŭ niejki momant žyćcio palacieła sabaku pad chvost. Ciapier Makbrajd raźviedzieny, žyvie ŭ mateli, hłušyć litrami ałkahol, a taksama pierabivajecca vypadkovymi spravami.
Taki stan rečaŭ praciahvajecca da toj pary, pakul Bili nie padvaročvajecca sprava ŭsiaho žyćcia — tajamničaja śmierć maładoha supracoŭnika abarončaha pradpryjemstva. Supraćstajać Bili ŭ hetaj spravie budzie jahony kolišni kampańjon — Donald Kupierman.
Varta adznačyć bliskučuju ihru Bili Bobi Torntana — vykanaŭcy hałoŭnaj roli. Mienavita jon atrymaŭ «Załaty hłobus» za najlepšuju mužčynskuju rolu ŭ sieryjałach za 2017 hod.
«Kaciaryna Vialikaja» (Catherine the Great)
Bijahrafija. Vialikabrytanija, 1-y siezon
U Brytanii kolki hadoŭ tamu ź vialikim pośpiecham prajšli premjery sieryjałaŭ «Viktoryja» (pra karalevu Viktoryju) i «Karona» (pra karalevu Lizavietu II). Hetym razam ža brytanskija kiniematahrafisty vyrašyli stvaryć film pra rasijskuju impieratrycu. U śviecie dla mnohich Kaciaryna II źjaŭlajecca etałonam žančyny ŭ palitycy. Kanclerka Hiermanii Anhieła Mierkiel pryznavałasia, što zachaplajecca rasijskaj kiraŭnicaj.
U čas kiravańnia Kaciaryny Rasijskaja impieryja značna pašyryła svaje miežy. My viedajem, što adbyłosia heta ŭ tym liku i praz padzieły Rečy Paspalitaj. Cikava, jak u sieryjale budzie pakazanaja hetaja staronka historyi? Ci znojdziecca tam miesca Stanisłavu Aŭhustu Paniatoŭskamu i Tadevušu Kaściušku? Miarkujučy pa ŭsim, na sieryjał stvaralniki nie paškadavali hrošaj: buduć tam i pałacavyja intryhi i maštabnyja vajskovyja sceny.
«Vartavyja» (Watchmen)
Supierhierojskaja drama. ZŠA, 1-y siezon
Padziei adbyvajucca ŭ naš čas u alternatyŭnaj realnaści ŭ ZŠA. U hetaj krainie niama mabilnikaŭ i internetu, a krainaj užo 27 hadoŭ kiruje dyktatar Robiert Redfard. Paśla taho, jak radykalnaja pravaja siekta napadaje na damy palicejskich, usia palicyja pačynaje nasić žoŭtyja paviazki na tvarach.
U hetaj krainie supierhieroi i mściŭcy byli abvieščanyja pa-za zakonam, ale niekatoryja ź ich usio ž źbirajucca razam, kab pačać revalucyju. Inšyja buduć im u hetym zaminać. Karaciej, na haryzoncie zamajačyŭ čarhovy kaniec śvietu. Kłasičny taki supierhierojski kaktejl, amatary pavinny acanić.
Hladzi taksama: Piać sieryjałaŭ, jakija varta hladzieć u žniŭni
Piać sieryjałaŭ, jakija varta pahladzieć u vieraśni
