14 lutaha ŭ kaściole sv. Symona i Aleny ŭ Miensku adbyłasia biełaruska‑polskaja navukovaja kanfierencyja, pryśviečanaja asobie Edvarda Vajniłoviča (1847‑1928).Hałoŭny hieroj navukovych abradaŭ byŭ prykmietnaj postaćciu biełaruskaj historyi rubiaža XIX — XX st.
Možna pryhadać, što jon byŭ adnym z pradstaŭnikoŭ krajovaści ŭ hramadska‑palityčnym ruchu na biełaruskich i litoŭskich ziemlach, kiravaŭ Minskim tavarystvam sielskaj haspadarki, jakoje mocna pryčyniłasia da haspadarčaha raźvićcia Minščyny, byŭ deputatam Dziaržaŭnaj Rady Rasijskaj impieryi (1906‑1909), fundataram šmatlikich kulturnickich prajektaŭ biełaruskaha nacyjanalnaha ruchu, aŭtaram cikavych ŭspaminaŭ, što ŭpieršyniu vyjšli ŭ druku ŭ 1931 h. u Vilni, i, narešcie, fundataram kaścioła sv.Symona i Aleny. Užo sam frahmientarny pieralik zroblenaha hetym čałaviekam uražvaje. Miž tym biełaruskija i polskija daśledčyki da hetaha času nie zdoleli asensavać postać E.Vajniłoviča ŭ navukovym bijahrafičnym vydańni.
Inicyjatarami i arhanizatarami kanfierencyi vystupili Polski Instytut u Minsku, parafija sv.Symona i Aleny, i historyka‑kulturnaja arhanizacyja «Pałonika‑Lituanika».
Na adkryćci kanfierencyi vystupili ksiondz Uładzisłaŭ Zavalniuk, jaki pieradaŭ pryvitańnie jaje ŭdzielnikam ad Mitrapalita Minska‑Mahiloŭskaha arcybiskupa Tadevuša Kandrusieviča, ambasadar Polšy ŭ Biełarusi sp.Hienryk Litvin i kiraŭnik «Pałoniki‑Lituaniki» sp.Alaksandr Stralcoŭ‑Karvacki.
U centry navukovaha abmierkavańnia akazalisia prablemy radavodu Edvarda Vajniłoviča (supracoŭnik Nacyjanalnaha histaryčnaha archiva Biełarusi Źmicier Jackievič), jahonaj palityčnaj i haspadarčaj dziejnaści (prafiesar EHU Aleś Smalančuk: «Dziaržaŭnaja Rada: dziejnaści dziela Kraju», prafiesar univiersitetu ŭ Hdańsku Daryjuš Špopier: «Palityčnyja aśpiekty dziejnaści Vajniłoviča», doktar Varminska‑Mazurskaha univiersitetu Raman Jurkoŭski: «dziejnaść u Minskim tavarystva sielskaj haspadarki i ahrarnaj kamisii», Alaksandr Stralcoŭ‑Karvacki: «Dziejnaść u revalucyjnaj zavirusie»), dabračynnaja dziejnaść «Uładzimir Dzianisaŭ (supracoŭnik Nacyjanalnaha histaryčnaha archiva Biełarusi Uładzimir Dzianisaŭ: «Dar dla budučych pakaleńniaŭ — kaścioł sv.Symona i Aleny»), a taksama sproba asensavańnia losu i spačyny E.Vajniłoviča (ksiondz Uładzisłaŭ Zavalniuk: «Edvard Vajniłovič: śviedka času»).
Udzielniki kanfierencyi abmieńvalisia dumkami pra pierśpiektyvy dalejšaha navukovaha vyvučeńnia bijahrafii Edvarda Vajniłoviča. U pryvatnaści, Andrej Kištymaŭ ad imia Instytuta histaryčnych daśledavańniaŭ Biełarusi (EHU) vykazaŭ ideju navukovaha vydańnia poŭnaha tekstu ŭspaminaŭ Edvarda Vajniłoviča na biełaruskaj movie. Hetaje vydańnie moža stać padziejaj dla biełaruskaj histaryjahrafii i dla hramadskaha abmierkavańnia minułaha Biełarusi‑Litvy.
Padčas kanfierencyi prafiesar D.Špopier taksama paznajomiŭ prysutnych z ułasnaj manahrafijaj, pryśviečanaj Kanstancyi Skirmunt («Gente lithuana — Natione lithuana»: Palityčnaja dumka i dziejnaść Kanstancyi Skirmunt (1851 ‑1934)), jakaja ŭ minułym hodzie vyjšła z druku. Viadomy biełaruski historyk ź Biełastoku Aleh Łatyšonak prezientavaŭ ułasnuju knihu «Žaŭniery BNR».
