Bolš za 300 čałaviek aryštavanyja pa spravie «najbujniejšaj kramy dziciačaha porna» ŭ darknecie, zajavili amierykanskija śledčyja. Krama była začyniena ŭ minułym hodzie, ale rasśledavańnie praciahvajecca da hetaha času, piša bbc.com.
Sajt Welcome to Video prapanoŭvaŭ karystalnikam dziciačaje porna ŭ abmien na bitkoiny. Na partale było vosiem terabajt dziciačaha porna, abo bolš za dźvieście tysiač rolikaŭ, jakija byli papiarednie zahružanyja miljon razoŭ.
Apieracyju pa zakryćci sajta pravodziła mižnarodnaja hrupa, u jakuju ŭvachodzili śledčyja z Brytanii. ZŠA, Paŭdniovaj Karei i Hiermanii. Jaje padrychtoŭka zaniała try hady.
Paśla zakryćcia kramy śledčyja praciahnuli pracu pa identyfikacyi jak karystalnikaŭ sajta, tak i dziaciej, jakija trapili na videa. U noč na čaćvier śledčyja paviedamili, što pa padazreńni ŭ vykarystańni Welcome to Video byli aryštavanyja 337 čałaviek u 38 krainach.
Siarod hetych krain — Brytanija, ZŠA, Paŭdniovaja Kareja, Hiermanija, Ispanija, Saudaŭskaja Aravija, AAE, Čechija I Kanada. Mierkavany stvaralnik i ŭładalnik sajta, 23-hadovy hramadzianin Paŭdniovaj Karei Čon U Son, znachodzicca ŭ źniavoleńni na radzimie. Ministerstva justycyi ZŠA rychtujecca vystavić jamu abvinavačvańnie.
«Welcome to Video byŭ adnym ź pieršych sajtaŭ, jakija prapanoŭvali ahidnyja videa ŭ abmien na bitkoiny», - havorycca ŭ zajavie Brytanskaha ahienctva pa baraćbie z złačynnaściu.
Ab sajcie daviedalisia paśla aryštu brytanskaha piedafiła Mećju Fałdera, jaki ŭ lutym byŭ asudžany na 32 hadoŭ turmy. Paźniej termin skaracili da 25 hadoŭ.
Taksama ŭ miežach rasśledavańnia kamandzie pravaachoŭnikaŭ udałosia vyratavać 23 dziaciej ź situacyj, u jakich im pryjšłosia tryvać damahańni i zhvałtavańni. Praca pa pošuku dziaciej praciahvajecca.
«Złačyncam ŭ darknecie […] nia schavacca ad zakonu, - zajaviła kiraŭnik adździeła rasśledavańniaŭ Brytanskaha ahienctva pa baraćbie z złačynnaściu Nikiej Chołand. - Jany darma ličać, što niabačnyja i abaronienyja».
