Parłamienckaja kampanija vyjšła na toj etap, kali ludziam prapanujuć zrabić kančatkovy vybar miž kandydatami. Dla taho, kab ludzi nie pamylilisia z abrancam, prapanoŭvajecca ŭbačyć ich dachody za 2018 hod.
Dachod — heta nie tolki zarobak z asnoŭnaha miesca pracy, heta moža być i prodaž niejkaj majomaści, i hanarary, i padpracoŭki. Ale hetaja ličba ŭsio adno dazvalaje pabačyć, jak i dzie žyvie kandydat.
Maryja Vasilevič
22-hadovaja «Mis Biełaruś» Maryja Vasilevič adna z najbolš jarkich i miedyjnych asobaŭ. Spadarožnica Alaksandra Łukašenki vyłučajecca pa Kalvaryjskaj akruzie ŭ Minsku.
Vasilevič pracuje redaktaram na Biełteleradyjokampanii. Tym nie mienš, na telebačańni jana adpracavała daloka nie ŭvieś hod. Prybytak Maryi za 2018 hod skłaŭ 15 100 rubloŭ. Kali raźličyć heta pa miesiacach, to ŭ siarednim vychodzić 1250 rubloŭ.
Taksama va ŭłasnaści Vasilevič jość kvatera ŭ Minsku płoščaj 41,5 kvadratnych mietra, a taksama lehkavik. Praŭda, čamuści nie paznačajecca jaho marka.
Hienadź Davydźka
Staršynia «Biełaj Rusi» vyłučany kandydatam pa Uschodniaj akruzie Minska. Jahonym kankurentam pa akruzie źjaŭlajecca pradstaŭnik Partyi BNF Źmicier Kaśpiarovič.
U pačatku 2018 hoda Hienadź Davydźka jašče ŭznačalvaŭ Biełteleradyjokampaniju, ale ŭ lutym byŭ zamienieny na Ivana Ejsmanta. Tym nie mienš, na BT Davydźka praciahvaŭ vieści pieradaču «Kłub redaktaraŭ».
Dachod spadara Davydźki atrymaŭsia dastatkova ŭnušalnym. Za 2018 hod jon zajmieŭ 83 tysiačy rubloŭ. U siarednim na miesiac heta vychodzić kala 7 tysiač rubloŭ.
U Hienadzia Branisłavaviča va ŭłasnaści jašče adnakvaterny dom u Babrujsku, a taksama ziamielnyja ŭčastki ŭ Babrujskim rajonie.
Nu i nie zabyvajcie pra nadzieł Davydźki ŭ Drazdach. Pry hetym staršynia «Biełaj Rusi» farmalna jašče nie zdaŭ katedž u ekspłuatacyju, choć chvaliŭsia, što ŭžo adśviatkavaŭ navasielle.
Dla paraŭnańnia, u Kaśpiaroviča hadavy dachod skłaŭ 21 tysiaču 600 rubloŭ. Va ŭłasnaści ŭ kandydata kvatera i dva aŭtamabili.
Lilija Ananič
Byłaja ministarka infarmacyi bałatujecca pa Barysaŭskaj sielskaj akruzie. Heta małaja radzima Lilii Ananič, jana naradziłasia ŭ vioscy Levanova. Kandadytka viadzie dastatkova aktyŭnuju kampaniju, amal štodnia rapartujučy ab praviedzienych sustrečach u fejsbuku i instahramie.
Na siońnia Ananič — namieśnica staršyni hramadskaha abjadnańnia «Biełaruski sajuz žančyn». Za 2018 hod jaje dachod skłaŭ 21 tysiaču 640 rubloŭ. Kali raźbić na dvanaccać miesiacaŭ, to atrymlivajecca niešta kala 1800 rubloŭ.
Va ŭłasnaści Ananič taksama katedž u ahraharadku Siomkava pad Minskam płoščaj 290 kvadratnych mietraŭ, a taksama aŭtamabil «Tajota Aviensis» 2006 hoda.
Pa akruzie taksama idzie hałoŭny pažarny Barysaŭskaha rajona Uładzimir Pikuza. Jahony dachod za hod skłaŭ 31 tysiaču rubloŭ.
Ihar Marzaluk
Historyk, archieołah Ihar Marzaluk u druhi raz sprabuje patrapić u parłamient pa Mahiloŭskaj-Leninskaj akruzie №84. Aproč deputactva, Marzaluk usio jašče vykładaje ŭ Mahiloŭskim dziaržaŭnym univiersitecie imia Kulašova.
Dachod Marzaluka za 2018 hod skłaŭ 63 tysiačy 88 rubloŭ. U pieravodzie na miesiacy heta składaje kala 5250 rubloŭ. Całkam sabie prystojnyja hrošy dla Mahilova. U Marzaluka taksama majecca kvatera płoščaj 62,8 mietra.
Samym bahatym kandydatam pa Mahilovie staŭ dyrektar vahonabudaŭničaha zavoda Vital Martynaŭ. Jaho dachod skłaŭ 69556 rubloŭ. Taksama ŭ jaho ŭłasnaści kvatera, dom i haraž.
Źviartaje na siabie ŭvahu taksama vyłučeniec kampanii «Lehałajz Biełaruś» Michaś Varancoŭ. Jon taksama vyłučajecca ŭ Mahilovie i paznačany jak biespracoŭny. Tym nie mienš, za minuły hod jahony dachod skłaŭ 39 tysiač rubloŭ. Vychodzić bolš za 3 tysiačy na miesiac.
Tenhiz Dumbadze
Viadučy ANT idzie na vybary pa minskaj Partyzanskaj akruzie №110. Dachod Dumbadze paznačany jak 25 tysiač rubloŭ. Heta značyć, štomiesiac jon maje kala 1 tysiačy dalaraŭ.
Naprykład, pa hetaj ža akruzie dyrektar kaledža pradprymalnictva Viktar Małatoŭnik maje za 2018 hod amal 40 tysiač rubloŭ.
Staršynia ŁDPB Aleh Hajdukievič zadekłaravaŭ za 2018 hod 22 tysiačy rubloŭ dachodu. Hajdukievič idzie na vybary pa Kalinoŭskaj akruzie.
Maryna Lančeŭskaja
Kiraŭnica sakrataryjata staršyni praŭleńnia «Biełarusbanka» Maryna Lančeŭskaja — kandydatka ad uładaŭ pa Zachodniaj akruzie Minska.
Za 2018 hod Lančeŭskaja mieła 120 tysiač rubloŭ dachodaŭ. Lohka padličyć, što heta kala 10 tysiač rubloŭ na miesiac. Lančeŭskaja — dačka kolišniaha namieśnika kiraŭnika Administracyi prezidenta Alaksandra Papkova. Taksama va ŭłasnaści Lančeŭskaj kvatera płoščaj 130 kv.m. i aŭtamabil.
Pasoł Biełarusi ŭ Turcyi Andrej Savinych letaś zarabiŭ 46 tysiač jeŭra. Jaho miesiačny zarobak takim čynam składaje 3800 jeŭra. Plus da ŭsiaho ŭ Savinych taksama nakapała 8500 biełaruskich rubloŭ. U niekatorych kandydataŭ heta zarobak za ceły hod.
