Praciahvajucca straści vakoł Minskaha inavacyjnaha ŭniviersitetut (MIU). Ministerstva adukacyi i administracyja VNU pačarhova abvinavačvajuć adzin adnoha pa roznych punktach.
Hałoŭnaja pretenzija Minadukacyi — u dystancyjnaj formie navučańnia studentaŭ. Sprava ŭ tym, što ŭ MIU mieła ekskluziŭnaje prava prymać ekzamieny, zaliki, kursavyja i dypłomnyja nie asabista, a anłajn. Dystancyjnaje navučańnie jość i ŭ inšych VNU krainy, ale tam studenty ŭsio ž źjaŭlajucca na ekzamienach pierad vykładčykami, u MIU ž heta było zusim nie abaviazkova.
Sprava ŭ tym, što jašče ŭ 2014 hodzie takoje prava dla tady jašče Minskaha instytutu kiravańnia daŭ tahačasny ministr adukacyi Siarhiej Maskievič. Nakiravana heta było ŭ pieršuju čarhu dla źniavolenych, jakija chočuć atrymać vyšejšuju adukacyju, ale karystalisia hetym punktam i inšyja studenty.
Siarhiej Maskievič.
«Naša Niva» datelefanavałasia da Siarhieja Maskieviča, jaki ciapier uznačalvaje Mižnarodny dziaržaŭny ekałahičny instytut imia Sacharava BDU, kab raspytać, jak tak atrymałasia, što MIU zajmieŭ takuju ŭnikalnuju mahčymaść.
«Ja zusim nie pamiataju taho, što było ŭ toj čas. Razumiejecie, tady adbyvałasia šmat mierapryjemstvaŭ, usio nie ŭzhadaješ. Ale padstavy dla takoha rašeńnia, biezumoŭna, byli», — adkazaŭ Maskievič.
Na pytańnie, ci pamiataje Maskievič prahramu navučańnia źniavolenych, jon adkazaŭ, što nie.
«Dystancyjnaje navučańnie isnavała daŭno. Adnosna taho, što studenty mohuć nie źjaŭlacca pierad vykładčykami ŭvohule ni razu za čas navučańnia — ja takoha nie pamiataju. Niejkija padstavy ž byli», — skazaŭ eks-čynoŭnik. Darečy, Maskievič razmaŭlaŭ na biełaruskaj movie.
Były ministr adukacyi skazaŭ «NN», što absalutna nie sočyć za situacyjaj, jakaja ŭtvaryłasia vakoł MIU.
