Telefonnyja machlary sprabujuć daviedacca kanfidencyjalnuju infarmacyju, pradstaŭlajučysia bankaŭskimi rabotnikami, jakija nibyta sprabujuć admianić niesankcyjanavany pieravod hrošaj abo pamyłkova aformleny kredyt. U internecie złamyśniki ŭzłomvajuć staronki sacsietak i vystupajuć iłžepakupnikami, raskazaŭ žurnalistam načalnik adździeła reahavańnia na kampjutarnyja pahrozy ŭpraŭleńnia abarony infarmacyi Nacyjanalnaha banka Biełarusi Siarhiej Majsiejšyn, pieradaje BiełTA.
U Biełarusi pačaścilisia vypadki telefonnaha machlarstva — višynhu. Machlary telefanujuć klijentam biełaruskich bankaŭ, pradstaŭlajucca supracoŭnikami słužby biaśpieki abo prosta supracoŭnikami banka, pad tym ci inšym vyhladam prosiać paviedamić danyja ab bankaŭskaj płaciežnaj kartcy, pašpartnyja danyja, kody, jakija prychodziać na telefonny numar, łahiny i paroli ad sistemy dystancyjnaha bankaŭskaha absłuhoŭvańnia.
Złamyśniki taksama mohuć vykarystoŭvać prahramy-ananimajziery. U takim vypadku pry ŭvachodnym zvanku klijent banka budzie bačyć na svaim telefonie numar banka, raźmieščany na aficyjnym sajcie. Razam z tym machlary mohuć padmianić nie telefonny numar całkam, a adnu ličbu ŭ im. Takim čynam, klijentu bolš składana vizualna identyfikavać aryhinalnaść numara banka. Dla bolšaj praŭdapadobnaści złamyśniki vykarystoŭvajuć u jakaści fonu pry telefanavańni šum pracujučaha koł-centra banka.
Pavodle słoŭ Siarhieja Majsiejšyna, adzin z asnoŭnych scenaryjaŭ padmanu vyhladaje nastupnym čynam: pry telefanavańni złamyśnik pradstaŭlajecca rabotnikam banka, paviedamlaje, što adnosna rachunku klijenta pravodziacca machlarskija dziejańni. Pavodle lehiendy, kab praduchilić niesankcyjanavany pieravod abo źniaćcie hrošaj u bankamacie, klijentu treba pradstavić infarmacyju ab bankaŭskaj płaciežnaj kartcy abo inšyja danyja.
Jašče adzin scenaryj — złamyśnik telefanuje trymalniku kartki i havoryć ab tym, što na jaho imia nibyta aformleny kredyt. Dla jaho admieny taksama patrebna ŭdakładniajučaja infarmacyja.
U Nacbanku źviartajuć uvahu, što pry telefanavańni klijentu bank zaŭsiody viedaje ŭsiu nieabchodnuju infarmacyju. «Paviedamlać kamu-niebudź danyja ab bankaŭskaj kartcy, pašpartnyja danyja, kody kateharyčna zabaroniena, - padkreśliŭ Siarhiej Majsiejšyn. - Jak tolki subiasiedniki pačynajuć zapytvać takuju infarmacyju, rekamiendujem zaviaršyć zvanok i patelefanavać na numar banka, paznačany na jaho aficyjnym sajcie».
Akramia taho, u Nacbanku akcentujuć uvahu, što machlary sprabujuć atrymać hrošy praz uzłamanyja staronki ŭ sacsietkach - byccam by ad imia siabra prychodzić paviedamleńnie z prośbaj dać danyja bankaŭskaj kartki dla pieravodu hrošaj. Złamyśniki taksama mohuć prykidvacca pakupnikami: pad vyhladam zacikaŭlenaści jany źviartajucca da pradaŭca i havorać ab namiery kupić jaho tavar u internecie. «Pradaŭcu dajuć spasyłku, pierajšoŭšy pa jakoj klijent uvodzić svaje rekvizity i tym samym pieradaje ich złamyśniku. U dalejšym machlar vykarystoŭvaje ich dla hrašovych pieravodaŭ», - rastłumačyŭ pradstaŭnik Nacbanka.
Zafiksavana niamała vypadkaŭ, kali złamyśniki prosiać mabilny telefon pad vyhladam zvanka, a zatym ustanaŭlivajuć na im prahramnaje zabieśpiačeńnie dla niesankcyjanavanych hrašovych pieravodaŭ.
Kolkaść paciarpiełych ad višynhu pakul nie ahučvajecca, ale miarkujecca, što ich sotni. Chvala zvankoŭ telefonnych machlaroŭ pradaŭžajecca. Nacbank rekamienduje prajavić pilnaść, nikomu nie pieradavać kanfidencyjalnuju infarmacyju.
