Vajenkamaty viaduć pryjom zajavaŭ hramadzianaŭ, jakija chočuć atrymać vajskovuju adukacyju... u Rasii i Kazachstanie. Piša Barys Tumar.
Jak zaznačajecca ŭ abviestkach, rajonnyja vajskovyja kamisaryjaty ažyćciaŭlajuć pryjom zajavaŭ dla adboru kandydataŭ ź liku cyvilnaj moładzi, jakija chočuć pastupić u 2009 hodzie ŭ vajskovyja navučalnyja ŭstanovy Ministerstvaŭ abarony Rasijskaj Fiederacyi i Respubliki Kazachstan.
Junakoŭ pryvablivajuć raźmiaščeńniem VNU «ŭ staličnych i abłasnych haradach z pryhožaj architekturaj, muziejami, histaryčnymi pomnikami».
Sens kampanii — padrychtavać aficeraŭ pa «deficytnych śpiecyjalnaściach, pa jakich padrychtoŭka kadraŭ u VNU Biełarusi nie pravodzicca».
Kaho ž biełarusy padrychtavać nie zdolnyja? Akazvajecca, deficytnyja śpiecyjalnaści — «radyjosuviaź, radyjoviaščańnie i telebačańnie» (pry najaŭnaści BDUIR i BDU), «šmatkanalnyja i telekamunikacyjnyja sistemy» (pry najaŭnaści BDUIR, pryčym škoła fiziki i radyjotechniki našaj krainy ličycca adnoj z najmacniejšych u śviecie), «prakurorska-śledčaja praca» (!), «prymianieńnie adździełaŭ radyjoelektronnaj vyviedki», «arhanizacyja vajenna-arkiestravaj słužby i dyryžavańnie arkiestrami». Sapraŭdy, dyryžavać arkiestrami biełarusaŭ tolki starejšy brat moža navučyć.Paralelna z pryščapleńniem rasijskaha patryjatyzmu.
Viadoma, Kazachstan tut dla admazki. Nichto ŭ stepy vučycca ź Biełarusi nie pajedzie. A voś na navučańnie ŭ Rasii chtości pakvapicca. Choć uzrovień padrychtoŭki tam zusim nie sučasny.
Darečy, što da Kazachstanu. Zhodna sa źviestkami kazachskaha Minabarony, na siońnia 200 kazachaŭ pa nakiravańniach vučacca ŭ sapraŭdy pieradavych vajskovych škołach krainaŭ NATA, i tolki ŭ 2008 hodzie, jak zajaviŭ načalnik upraŭleńnia MA Kazachstanu pa padrychtoŭcy kadraŭ Ihar Muchamiedaŭ, kolkaść kazachskich kursantaŭ u zamiežnych VNU pavialičyłasia na 33%.
Naturalna, što takija abviestki źjaviłasia nie ź inicyjatyvy peŭnaha vajenkama. Heta palityka Minska. Ale ŭsio adno sumna. Bo adna sprava kali b biełaruskich kursantaŭ pasyłali kudyści atrymać lepšyja viedy. I zusim inšaja — kali biełaruskich chłopcaŭ zusim adkryta, dyj jašče z dapamohaj byccam by biełaruskich strukturaŭ, viarbujuć susiednija dziaržavy.
