Čytačy «Našaj Nivy» źviarnuli ŭvahu na toje, što na ŭvachodzie ŭ rezidencyju rasijskaha pasła ŭ Minsku visić aficyjnaja šylda, dzie nazva krainy pa-rusku napisana «Riespublika Biełoruśsija», chacia aficyjna takoj dziaržavy nie isnuje.
U čym sprava? Raniej pasoł Mieziencaŭ ćviorda kazaŭ, što «jedzie pracavać u Respubliku Biełaruś».
Jak tłumačać u pasolstvie Rasii, šylda hetaja staraja, z časam jaje, «napeŭna», zamieniać.
«Ja pavažaju moŭnyja pryncypy biełarusaŭ i źviarnu ŭvahu pasła na heta. Nichto nie choča nikoha kryŭdzić. Z časam, napeŭna, zamienim, heta pakul nie asnoŭnaje. Ale viedajecie, letaś na adnym sumiesnym mierapryjemstvie niejki naš deputat u kampanii kazaŭ «Biełaruś», a niechta z vašych — «Biełoruśsija», — skazaŭ «Našaj Nivie» pres-sakratar rasijskaha pasolstva Alaksiej Maskaloŭ.
