Siońnia Leninski sud stalicy vynies prysud u spravie źbićcia režysiora Mikałaja Kupryča. Vyrak dla Ivana Hulaja — abmiežavańnie voli terminam na paŭtara hoda biez nakiravańnia ŭ miescy pazbaŭleńnia voli, 5 tysiačaŭ biełaruskich rubloŭ za maralnuju škodu i 400 rubloŭ — na pasłuhi advakatu, piša Biełsat.
Pavodle paciarpiełaha, režysiora i apieratara dakumientalnaha kino Mikałaja Kupryča, jamu było važna pakazać, što hałoŭnym matyvam dla źbićcia stała nianaviść da ŁHBTK+ supolnaści. Razam z abaroncami — advakatam Dźmitryjem Lepretaram i pravaabarončaj arhanizacyjaj «Pravavaja inicyjatyva» — jon doŭha dabivaŭsia, kab śledčyja pryniali hamafobiju Ivana Hulaja da ŭvahi.
Prakuror padčas suda zaznačyŭ, što złačynstva było ździejśniena na hlebie nianaviści da ŁHBTK+ supolnaści i zaličyŭ hety fakt jak abciažaranyja abstaviny. Padčas vočnych stavak abvinavačvany Ivan Hulaj pryznavaŭsia, što źbiŭ Mikałaja i jahonych siabroŭ, bo dumaŭ, što jany hiei.
— My prasili samy minimalny prysud, jaki možna atrymać pa hetym artykule — adzin miesiac aryštu. Mnie chaciełasia dać jamu ŭrok. Niachaj by miesiac pasiadzieŭ, zrazumieŭ by moža, što bolš tak nie rabić, — tłumačyć Mikałaj.
Pavodle jaho, źbiŭšy jaho čałaviek vychodziŭ z zali suda ŭ dobrym nastroi.
— Napeŭna, jon jašče nie zrazumieŭ, što žyćcio ŭ jaho ŭsio-tki źmienicca na hetyja paŭtara hoda, — kaža paciarpieły režysior.
Pavodle jurystki Haliny Charłanavaj z arhanizacyi «Pravavaja inicyjatyva», jakaja dapamahała Kupryču, hetuju spravu možna ličyć złačynstvam na hlebie nianaviści.
— Kali kazać prostaj movaj i apuskać niecenzurnyja cytaty, to abvinavačany pytaŭ, ci źjaŭlajecca Mikałaj hiejem. Nie atrymaŭšy dakładnaha adkazu jon pierapytvaŭ, pakul Mikałaj jamu nie adkazaŭ «Nu niachaj ja budu hiejem». Hetaha vyrazu było dastatkova, kab źbić jaho, — kaža jana.
Mikałaj Kupryč byŭ źbity ŭ noč z 24 na 25 žniŭnia na vulicy Kastryčnickaj u Miensku. Da jaho padyšoŭ nieviadomy čałaviek i źbiŭ. Tady mužčyna znachodziŭsia razam ź siabrami, napadnik ahresiŭna zapytaŭsia: «Ty pi..ar?». U vyniku kanfliktu Kupryč atrymaŭ čerapna-mazhavuju traŭmu i pierałom nosa.
