U žychara Baranavič skrali siamiejnuju relikviju — kaštoŭnuju manietu carskaj čakanki z vyjavaj cara Mikałaja II, jakaja dastałasia jamu ad dzieda. Pra najaŭnaść takoj u paciarpiełaha viedali niamnohija, paviedamlaje milicyja.
Apieratyŭniki vyznačyli koła padazravanych, tudy patrapiła byłaja žonka paciarpiełaha: siamiejnaja para doŭhi čas žyła razam, pakul žančyna nie pačała złoŭžyvać śpirtnym, z-za čaho potym straciła pracu. Paśla razvodu eks-muž i žonka zastalisia pad adnym dacham, ale svoj pakoj mužčyna zamykaŭ na kluč.
Sa słoŭ apieratyŭnikaŭ, haspadar kvatery nieadnarazova zajaŭlaŭ u milicyju pra kradziažy svajho zaručalnaha piarścionka, adnak štoraz žančyna paśpiavała vykupić jaho z łambarda. U vypadku z manietaj takaja schiema nie prajšła: siamiejnuju kaštoŭnaść žančyna pradała miascovamu kalekcyjanieru, ale pradała jaje minimum u 4 razy tańniej — numizmaty aceńvajuć redkuju manietu ŭ 800 rubloŭ.
Zaviali kryminalnuju spravu za kradziež.
