Hanna Kanapackaja paćvierdziła, što zapłaciła 500 jeŭra dla taho, kab kandydatka-samavyłučenka Volha Kavalkova mahła ŭziać udzieł u prajmieryz ad apazicyi. Pra heta jana zajaviła ŭ intervju «Našaj Nivie».
Sprava ŭ tym, što za partyjnych kandydataŭ — Sieviarynca, Kazłova, Hubareviča i Janukieviča — płaciać ich struktury, a astatnija pavinna pieraličyć hrošy sami.
«Naša Niva» patelefanavała Kavalkovaj, kab spraŭdzić słovy Kanapackaj, adnak sutyknulisia ź vielmi dziŭnaj reakcyjaj. Pryvodzim dyjałoh dasłoŭna.
«Naša Niva»: Volha, u intervju «Našaj Nivie» Hanna Kanapackaja skazała, što zapłaciła za vas 500 jeŭra dla ŭdziełu ŭ prajmieryz. Chacieli b spraŭdzić, ci sapraŭdy heta tak?
Volha Kavalkova: Davajcie my z Hannaj Anatoljeŭnaj budziem sami vyrašać hetaje pytańnie biez «Našaj Nivy».
«NN»: Nu jana ž raskazała, a čamu vy nie možacie?
VK: Okiej, usie pytańni da jaje.
«NN»: A vy nie možacie adkazać na hetaje pytańnie?
VK: Ja vam adkazała.
«NN»: Što vy adkazali?
VK: Što budu vyrašać hetaje pytańnie z Hannaj Anatoljeŭnaj, a nie z «Našaj Nivaj».
«NN»: Čamu vy admaŭlajeciesia kamientavać?
VK: Nu ja vam skazała, ja nie budu ničoha kamientavać.
«NN»: Nie razumieju, vy ličycie, što heta vaša asabistaja sprava, a nie publičnaja?
VK: Što nie publičnaja?
«NN»: Hetyja 500 jeŭra, jakija za vas zapłaciła Kanapackaja.
VK: Za mianie nichto nie płaciŭ, davajcie tak.
«NN»: To-bok Kanapackaja chłusić?
VK: Heta vaša śćvierdžańnie.
«NN»: Možna stavić navinu: «Volha Kavalkova: Kanapackaja za mianie nie płaciła»?
VK: Jak chočacie, staŭcie. Ale vy manipulujecie maimi słovami.
«NN»: Ja ŭsiaho tolki prašu ŭ vas kamientar.
VK: Vy zaraz chočacie sa mnoj dyjałohu ci čaho?
«NN»: Ja chaču kamientar. Vy ž sprabujecie zrabić vyhlad, što heta vaša asabistaja sprava, a heta absalutna nie tak — heta publičnaja sprava.
VK: Čamu vy aceńvajecie, što jość publičnym, a što niepubličnym?
«NN»: Pa-pieršaje, bo prajmieryz — heta publičnaja źjava; pa-druhoje, tamu što Kanapackaja raskazała pra heta publična. Tamu heta nie moža zastavacca vašaj pryvatnaj spravaj.
VK: A mnie treba vam dać śpis ludziej, moža, jakija achviaravali hrošy?
«NN»: Nie treba. U mianie kankretnaje pytańnie: Kanapackaja vam davała 500 jeŭra ci nie?
VK: Vy jak zadavali pytańnie, tak svaje i maje słovy i pracytujcie, jak zapisana na dyktafonie.
«NN»: Jašče raz: vy admaŭlajeciesia kamientavać?
VK: Prasłuchajcie, jak zapisana na vašym dyktafonie.
«NN»: Vam soramna, što Kanapackaja za vas zapłaciła?
VK: Kanapackaja za mianie nie płaciła. Pasłuchajcie, kali łaska, jašče raz dyktafonny zapis i dajcie ŭsio dakładna, jak u hetym zapisu.
«NN»: Cytuju słovy Kanapackaj. «NN»: Darečy, vy byli hatovyja zakinuć 500 jeŭra za kandydactva Kavalkovaj. Zrabili heta? Hanna Kanapackaja: Tak. «NN»: Čamu mienavita za Kavalkovu? HK: Bo ź inšych bolš nichto nie prasiŭ».
VK: A ja chiba prasiła ŭ Kanapackaj hrošaj?
«NN»: Adzinaje, što ja prašu, — prakamientavać słovy Kanapackaj. Heta praŭda ci nie?
VK: Ja vam prakamientavała. Vam što, niedastatkova hetaj frazy, kab pastavić jaje ŭ hałoŭnaje, što Kanapackaja za mianie nie płaciła.
«NN»: Jašče raz udakładniu: Kanapackaja chłusić?
VK: Heta vaša śćvierdžańnie.
«NN»: Heta nie śćvierdžańnie, a pytańnie.
VK: Jak vy farmulujecie pytańni, hetak ja i adkazvaju. Vy zadali pytańnie, ci płaciła Kanapackaja za mianie i moj udzieł u kampanii, i moj adkaz: «Nie, nie płaciła».
«NN»: A za što jana vam dała 500 jeŭra?
VK: Kamu dała?
«NN»: Vam.
VK: Ja prašu vas pastavić toj kamientar, jaki ja vam užo dała.
«NN»: Čamu vy vykručvajeciesia zaraz?
VK: Heta vy vykručvajeciesia.
«NN»: Kali b mnie dali 500 jeŭra, to ja b skazaŭ, što mnie dali 500 jeŭra.
VK: Tak, jak navinu dała «Naša Niva», vyhladaje, što ja pryjšła nibyta da Kanapackaj prasić u jaje hrošy.
«NN»: Tamu ja vam i telefanuju, kab vy mahli raskazać, jak usio było nasamreč.
VK: Ja nie prasiła Kanapackuju ni pra jakija hrošy, ja prasiła ab padtrymcy ŭ biełarusaŭ. I toj, chto pieraličyŭ niejkija hrošy, ja im padziakavała.
«NN»: Siarod hetych pieravodaŭ byli 500 jeŭra ad Kanapackaj?
VK: A chto heta byŭ: Kanapackaja, Ivanoŭ ci Piatroŭ — heta niavažna. I kali «Naša Niva» zadaje pytańnie, a Hanna Anatoljeŭna adkazvaje, što ledź nie prapłaciła moj udzieł, to heta chłuśnia. Kožny dziejničaje ad siabie asabista, kali b Volha Kavalkova zachacieła pieraličyć kamuści hrošy na ŭdzieł u prajmieryz, to heta było b majo asabistaje žadańnie, a nie tak, jak kamuści chočacca heta padnieści.
«NN»: Heta ž było ŭ kamientarach u fejsbuku. Vy abviaścili zbor srodkaŭ, a Kanapackaja prapanavała apłacić usiu sumu. My spytali ŭ Kanapackaj, jana paćvierdziła, ciapier pytajemsia ŭ vas.
VK: Tam nie tak! Tam nie tak!
«NN»: [Znoŭ cytujem toj samy ŭryvak ź intervju Kanapackaj].
VK: A ja ŭ Kanapackaj taksama nie prasiła. Vy kažacie, što heta publičnaje pytańnie, prosicie kamientar. Ja kažu, kali jość pytańnie, to zadavajcie jaho Kanapackaj, kali vas hety adkaz nie zadavalniaje.
«NN»: My źviartalisia da Kanapackaj, jana heta paćvierdziła. Ciapier prosim vas.
VK: Heta vyhladaje tak, što bolš nichto nie prasiŭ. Dyk ja taksama ŭ Kanapackaj nie prasiła, voś i ŭsio. Ja nie prasiła nivodnaha kankretnaha čałavieka dapamahčy: heta było asabistaje žadańnie Hanny Kanapackaj, voś i ŭsio. I ja nie skažu, chto jašče padtrymaŭ kampanii.
«NN»: Ja nie prašu skazać, chto jašče.
VK: A moža, inšyja ludzi vas by taksama zacikavili?
«NN»: Moža być, ale tut jość kankretnyja słovy Kanapackaj, što jana zakinuła za vaša kandydactva 500 jeŭra.
VK: A vy nie dumajecie, kali jana navat zakinuła hetyja hrošy, to na prajmieryz pajšli maje asabistyja srodki?
«NN»: Tady vychodzić, što 500 jeŭra Kanapackaj vy zabrali na svaje asabistyja patreby?
VK: Jakija asabistyja patreby?
«NN»: Dyk kali vy kažacie, što mahli svaimi srodkami zapłacić za prajmieryz, to kudy pajšli 500 jeŭra ad Kanapackaj?
VK: Pasłuchajcie, maje darahija žurnalisty, u vas nie atrymajecca manipulavać. Ja vam skažu, što achviaravała nie tolki Kanapackaja, ale vy nie pytajeciesia, chto jašče achviaravaŭ, kolki.
«NN»: Tamu što publična bolš nichto nie kazaŭ, Kanapackaja skazała, što achviaravała vam 500 jeŭra. Heta praŭda?
VK: Jana achviaravała, ale jana nie płaciła za moj udzieł u prajmieryz.
«NN»: Jana tady achviaravała vam na asabistaje žyćcio?
VK: Ja nie viedaju. Kali ja abviaščaju zbor srodkaŭ publična na kampaniju… Mnie nie padabajecca takoje manipulavańnie i taki adkaz Hanny Anatoljeŭny, što jana zapłaciła [za Kavalkovu — «NN»], bo nichto inšy nie prasiŭ.
«NN»: Volha, ja ŭžo kolki času vas prašu raskazać, jak usio było nasamreč, a vy ŭparta sprabujecie nie raskazvać.
VK: Mnie nie chočacca, kab takija rečy vykarystoŭvalisia, jak heta robić Hanna Kanapackaja. Kali ty daješ taki kamientar, to pavinna być adkaznaść. Kali maje siabry źbirajuć hrošy mnie i kažuć: «Vaźmi, Ola», to što, kožny ź ich pavinien pisać u fejsbuku, što daŭ mnie hrošy?
«NN»: Jany takija ludzi, a Kanapackaja — inšaja. Jana skazała. Vy mahli takoha čakać.
VK: Słuchajcie, kali čałaviek achviaruje… Ja nie źviartałasia da Kanapackaj z kankretnaj prośbaj: «Hanna Anatoljeŭna, zapłacicie za moj udzieł». A toje, što jana chacieła dapamahčy, to ja nie mahu kiravać jaje ŭnutranymi žadańniami. Kali jana kaža, što nichto inšy nie źviartaŭsia, to heta manipulacyja, ja taksama nie źviartałasia.
«NN»: Prabačcie, nu tam ža z farmuloŭki nie vynikaje, što vy źviartalisia asabista da jaje. Vy ž u fejsbuku źviartalisia.
VK: Prosta vyhladaje, što ja prašu kahości, a heta nie tak. Vyhladaje niepryhoža. Ja z Kanapackaj pracavała razam 3-4 hady, raspracoŭvała zakonaprajekty, dapamahała joj u pracy i nie atrymlivała za heta nijakich hrošaj. Jana za moj udzieł u prajmieryz nie płaciła. Dapamohu možna atrymać ad kaho zaŭhodna. Kampanija luboha kandydata kaštuje, na žal, nie 500 jeŭra. Heta kaštuje našmat bolšych hrošaj.
«NN»: A kolki vam pieraličyli ahułam na kampaniju?
VK: Ja nie budu heta kamientavać.
«NN»: Heta zakrytaja tema?
VK: Heta nie zakrytaja tema.
«NN»: Nu vy ž publična abviaščajecie pra zbor srodkaŭ, a čamu publična nie skazać, kolki vam pieraviali?
VK: Moža być, heta majo rašeńnie, ja nie chaču kazać.
«NN»: Kali čynoŭniki nie abviaščajuć, za jakija jany hrošy budujuć katedžy ŭ Drazdach, vam nie padabajecca, a kali vy nie kažacie, kolki atrymali na kampaniju, to heta narmalna?
VK: Kali jany budujuć damy za svaje hrošy, to mianie heta nie chvaluje. Kali ž jany budujucca za hrošy padatkapłacielščykaŭ, tady mianie chvaluje.
«NN»: A ŭ hetym vypadku havorka pra vašy asabistyja hrošy, tamu vy ničoha nie kažacie?
VK: Dzie maje asabistyja hrošy? Ja ŭkładaju ŭ kampaniju svaich srodkaŭ našmat bolej, čym mnie pieraviali.
«NN»: Kolki vam pieraviali hrošaj, vy možacie adkazać?
VK: Ja nie mahu adkazać.
«NN»: Čamu?
VK: Bo ja nie viedaju.
***
Paśla razmovy z karespandentam «NN» Volha Kavalkova apublikavała taki dopis u fejsbuku:
«Ja ŭdziačna ŭsim, chto ŭžo achviaravaŭ srodki i padtrymaŭ mianie, dziakuju za davier. Za papiaredni miesiac sabrana 3200 rubloŭ. Samaje bujnoje razavaje achviaravańnie skłała 500 rubloŭ. Śpisy ŭsich achviaradaŭcaŭ buduć apublikavanyja paśla majoj pieramohi [na vybarach] prezidenta Biełarusi».
