Biełarus Juryj Kuroŭski pracuje na polskuju firmu i pieryjadyčna z kalehami jeździć u kamandziroŭki ŭ Niamieččynu, Bielhiju i Niderłandy. Padčas svajoj apošniaj pajezdki jon žyŭ u Niamieččynie, u horadzie Vitenbierh. Jon moh zastacca tam, ale praz pandemiju z pracaj uźnikli składanaści: šmatlikija prajekty zamarozili abo pieranieśli. Tamu jon vyrašyŭ viarnucca dadomu, u Biełaruś. Ale ŭ Polščy jamu pryjdziecca zatrymacca na dva tydni, piša Hrodna.life.
Načalnik Juryja, viedajučy, što toj źbiraŭsia jechać dadomu ŭ krasaviku, prapanavaŭ źjechać ciapier. Juryj pahadziŭsia.
«Ja viedaŭ pra karancin [nieabchodnaść samaizalacyi na 14 dzion u Polščy — red.], tamu chacieŭ atrymać kankretnuju infarmacyju. Šef kazaŭ, što miaža volnaja — možna jechać. Telefanavaŭ dva razy ŭ ambasadu ŭ Polščy. Adzin raz skazali: možna jechać, druhi — budzie karancin. Uvohule, kankretna nichto nie ŭ kursie», — raspaviadaje Juryj.
Niama dzie prajści karancin — pasielać na 14 dzion za košt dziaržavy
21 sakavika ranicaj Juryj z dvuma kalehami vyjechaŭ u bok Polščy i nieŭzabavie byŭ na miažy. Miažu pierasiakali ŭ Frankfurcie na Odry — Słubicach. Čarhi nie było, jany byli naohuł adny ŭ punkcie propusku.
«Samich pamiežnikaŭ tam było čałaviek piać, troje ŭ achoŭnych kaściumach. Nijakich błokpastoŭ niama, — kaža Juryj. — Pierš za ŭsio vymiarali tempieraturu. Spytali, kudy i adkul jedu, pahladzieli pašpart, dazvoł na pracu. Skazali, što tranzit praz Polšču zabaronieny, skazali zapaŭniać ankietu na karancin».
Ankieta na karancin aficyjna nazyvajecca «łakalizacyjnaj kartaj». U joj treba paznačyć miesca prachodžańnia karancinu. Adzinaje miesca, jakoje Juryj viedaŭ, — žyllo ad firmy, na jakuju jon pracuje.
Zasialiŭšysia tudy, jon patelefanavaŭ jašče raz u ambasadu Biełarusi — tam skazali zastavacca na karancin.
Juryj na karancinie
Kali niama mahčymaści prajści karancin pa svaim adrasie, pra heta treba paviedamlać na miažy. Tam pavinny nakiravać va ŭstanovu, dzie možna budzie žyć hetyja 14 dzion.
Za niekalki hadzin znajšli žyllo na bazie adpačynku
«Patelefanavaŭ u polskuju sanepidsłužbu. Nastojvaŭ na tym, što ŭ mianie niama ni nieabchodnaści ŭ karancinie, bo ja ŭ Polščy tolki prajezdam, ni mahčymaści, bo akramia nas traich, jakija viarnulisia z Hiermanii, u hetaj ža kvatery znachodziacca jašče jak minimum troje chłopcaŭ, jakija z Polščy nie źjazdžali. Tak što lepš nam jechać dalej svajoj darohaj prama na miažu», — raspaviadaje Juryj.
Na praciahu niekalkich hadzin jamu pieratelefanavali i skazali, što arhanizavali žyllo i što jany pavinny tudy pierabracca i znachodzicca tam. Štraf za parušeńnie karancinu — 30 000 złotych (6500 jeŭra). Złosnych parušalnikaŭ čakaje aryšt, a kali parušalnik byŭ zaražany karanavirusam — hod turmy.
Baza adpačynku, kudy Juryj trapiŭ na karancin
Testaŭ u biełarusaŭ nie brali, ź lekarami abo pradstaŭnikami ŭłady jany asabista nie bačylisia. Sami na mašynie pierajechali na źniataje dla ich žyllo. Heta akazałasia niešta nakštałt letniaj bazy adpačynku.
«Abiacali, što buduć zabiaśpiečvać ježaj, ale pakul [pa stanie na 22 sakavika — red.] nikoha nie było. I nichto z pravierkaj da nas nie prychodziŭ. Dobra choć papiery tualetnaj tut z zapasam».
«Prosta chaču dajechać da miažy. Navošta mianie tut trymać?»
Juryj nie razumieje, za što jaho i kaleh zamknuli na karancin. «Inšyja chłopcy, jakija jechali ŭ toj ža dzień i na nastupny paśla nas, prajšli miažu biez usialakaha karancinu! Ja liču, što ja mahu spakojna jechać dalej dadomu, ni z kim u Polščy ja nie kantaktavaŭ i nie płanuju. Prosta chaču dajechać da miažy i ŭsio. Navošta mianie tut trymać?» — nie razumieje Juryj.
Ježa, jakuju Juryj atrymaŭ u karancinie
Krychu paźniej jamu patelefanavaŭ haspadar miesca, dzie ich pasialili: spytaŭ, ci ŭsio dobra, skazaŭ, što da viečara ŭklučać haračuju vadu, abiacaŭ udakładnić pytańni z charčavańniem.
«A jašče jon paprasiŭ, što kali chto-niebudź z hramadzianskich budzie pytacca ŭ nas, to lepš kazać, što my zusim nie na karancinie», — raspaviadaje Juryj.
Kaho adpraŭlajuć na karancin?
Usich, chto pryjazdžaje ciapier u Polšču, na miažy infarmujuć pra abaviazkovy 14-dzionny karantyn. Ad jaho vyzvalenyja tolki:
— tyja, chto žyvie ŭ Polščy, ale pracuje ŭ susiednich krainach i rehularna pierasiakaje miažu;
— zamiežniki, jakija žyvuć za miažoj, ale pracujuć u Polščy i rehularna pierasiakajuć miažu;
— kiroŭcy, jakija prafiesijna zajmajucca tavarnymi abo pasažyrskimi pieravozkami.
Jak praviarajuć vykanańnie karancinu?
Jak raspaviali Hrodna.life biełarusy, jakija žyvuć pastajanna ŭ Biełastoku, zachavańnie karancinu štodnia pavinna praviarać palicyja. Supracoŭniki mohuć telefanavać i, naprykład, prasić pakazacca ŭ aknie. Prychodzić abaviazany štodnia, ale mohuć i dvojčy ŭ dzień. Choć niekatoryja paviedamlajuć u internecie, što da ich palicyja tak i nie pryjšła.
Kab učastkovyja nie pavinny byli prychodzić da ŭsich, chto źmieščany na karancin, Ministerstva ličbavizacyi Polščy raspracavała admysłovy dadatak «Kwarantanna domowa» (Chatni karancin) dla Android i iOS.
Dadatak vykarystoŭvaje łakalizacyju pa GPS, robić fota z paznakaj času, raspaznaje tvar i dazvalaje źviazacca z haračaj linijaj pa pytańniach karancinu. Tak možna paćviardžać svaju prysutnaść doma, źviartacca ŭ orhany sacyjalnaj abarony i ŭ abhruntavanych vypadkach prasić dastavić dadomu pradukty abo leki, źviartacca pa dapamohu psichołaha. Karystacca dadatkam mohuć tyja, kaho pry pierasiačeńni miažy ŭnieśli ŭ śpiecyjalnuju bazu danych i abaviazali prajści karancin.
U Google Play šmat nizkich adznak: karystalniki skardziacca na bahi. Akramia taho, karystacca dadatkam možna nie adrazu, a tolki paśla atrymańnia SMS.
Pa stanie na 23 sakavika bolš za 80 000 čałaviek u Polščy pavinna było prajści chatni karancin, ź ich tolki 60 000 paśpieli ŭnieści ŭ bazu danych. Kožny čaćviorty zarehistravaŭsia ŭ dadatku.
Pavodle infarmacyi RMF FM, palicyja štodnia atrymlivaje paviedamleńni ad hramadzian, jakim zdajecca, što ich susiedzi parušajuć režym karancinu.
