Siońnia — dzień narodzinaŭ biełaruskaha historyka i kulturołaha Volhi Sabaleŭskaj. Jana pajšła z žyćcia 18 kastryčnika 2019 hoda z pryčyny ciažkaj chvaroby. Volha była nadzvyčaj dobrym, śvietłym, sumlennym čałaviekam. Z tonkim pačućciom humaru. Ź nievierahodnym aptymizmam i vieraj u ludziej. Talenavity i pracavity navukoviec: adzin z bujniejšych u Biełarusi śpiecyjalistaŭ pa historyi i kultury ŭschodniejeŭrapiejskich habrejaŭ. Jaje zasłužana nazyvajuć «Karaleva biełaruskaj iŭdaiki».
Z 1999 pa 2013 hady Volha Sabaleŭskaja pracavała dacentam kafiedry kulturałohii Hrodzienskaha dziaržaŭnaha ŭniviersiteta imia Janki Kupały. Kali va ŭniviersitecie adbyvałasia palityčna matyvavanaja «čystka», jana sprabavała adstajać spraviadlivaść i zakonnaść u našaj Alma-Matar. Ale ŭ vyniku joj samoj pryjšłosia jaje pakinuć… Volha vielmi baluča heta ŭsio ŭsprymała.
Ź vieraśnia 2013 h. i da apošnich dzion žyćcia Volha pracavała ŭ hrodzienskim filijale «Biełaruskaha instytuta pravaznaŭstva» dacentam kafiedry palitałohii, psichałohii i fiłasofii.
Jak vydatny navukoviec, pryznany śpiecyjalist pa iŭdaicy Volha Sabaleŭskaja viadomaja nie tolki ŭ Biełarusi, ale taksama ŭ Polščy, Rasii, Ukrainie, Litvie, Izraili dy inšych krainach. Na siońniašni dzień vyniki daśledavańniaŭ Volhi pa prablemach historyi i kultury habrejaŭ Uschodniaj Jeŭropy, histaryčnaj kulturałohii, urbanistycy, mižetničnych uzajemadziejańniaŭ — heta kala 120 publikacyj, u tym liku 4 manahrafii.
Zaŭčasnaja śmierć Volhi Sabaleŭskaj — vielizarnaja strata dla biełaruskaj histaryjahrafii i kulturałohii. Śvietłaja pamiać. R.I.P.
