U muža i žonki Daškievičaŭ ź Viciebska adnačasova dyjahnastavali pnieŭmaniju. Ich adpravili ŭ tubdyspanser, «ale tam było pierapoŭniena. Tamu my adprasilisia dadomu, daktary dali nam antybijotyki i adpuścili», — raskazała «Našaj Nivie» spadarynia Daškievič.
Adnak chvaroba nie adstupała, tempieratura rasła, i paru znoŭ špitalizavali — užo ŭ inšuju ŭstanovu, taksama pieraabstalavanuju pad lačeńnia lohačnych zachvorvańniaŭ.
«Doma ŭ muža padniałasia tempieratura. Nas nakiravali ŭ skurviendyspanser, jaki ciapier abstalavali pad pulmanałohiju. Pakłali ŭ roznyja pałaty. Tam uziali analizy na karanavirus, ale skazali, što analiz admoŭny», — praciahvaje spadarynia Daškievič.
24 sakavika 75-hadovamu Viktaru Daškieviču, zasłužanamu artystu Biełarusi, stała horš, i jaho pieraviali ŭ jašče adnu ŭstanovu, jakaja, treba razumieć, ciapier taksama vyznačanaja pad lačeńnie lohačnikaŭ, — u čyhunačnuju balnicu.
Jak viadoma, Covid-19 vyklikaje ŭskładnieńni ŭ vyhladzie spačatku suchoha kašlu, a paśla — pnieŭmanij, častka jakich praciakaje ŭ ciažkaj formie.
Vyklikaje nieŭrazumieńnie, što praz doŭhi čas paśla vyjaŭleńnia pnieŭmanii ŭ artysta Daškieviča (i jahonaj žonki), užo kali jany znachodzilisia ŭ balnicy, test na karanavirus byŭ nibyta ŭ abaich admoŭny, a paśla staŭ stanoŭčy — tolki ŭ muža, paśla taho jak jahony stan pahoršaŭ.
Niezrazumieła taksama, čamu niemaładuju žančynu ź pnieŭmanijaj užo praź piać dzion paśla špitalizacyi vypisali dadomu — prytym što ŭ hety ž dzień u jaje muža paćvierdzili karanavirus. Zvyčajna kurs lačeńnia pnieŭmanii daŭžejšy. Da taho ž, kali karanavirus u muža, a pnieŭmanija adnačasova ŭźnikła ŭ jaho žonki, to łahična było b, kab u jaje ŭziali paŭtorny analiz i trymali pad nazirańniem.
«U mianie paŭtorny analiz nie brali, skazali izalavacca i być doma 14 dzion, — kaža spadarynia Daškievič. — Dačka mnie nosić pradukty, pakidaje ich u padjeździe».
Takija racyjanalnyja miery pieraściarohi siamja prymaje z ulikam pahrozy zaražeńnia.
Z dakładnaściu taja ž situacyja adbyłasia ŭ minskaj siamji, dzie vyjavili dvuch chvorych. 60-hadovaha mužčynu špitalizavali ź pnieŭmanijaj jašče 17 sakavika i tolki 27 sakavika, kali jahony stan pahoršaŭ, siamji paviedamili pra karanavirus.
I ŭ viciebskim, i ŭ minskim vypadkach uźnikajuć anałahičnyja dumki. Abo pacyjenty z dvuch roznych haradoŭ zarazilisia ŭ balnicy — i tady pytańnie da łohiki raźmiaščeńnia pacyjentaŭ. Abo pieršyja testy, niahledziačy na najaŭnaść u abodvuch chvorych pnieŭmanij, dali pamyłkovyja vyniki. I tady pytańnie da jakaści prob, jakimi karystajucca ŭ Biełarusi.
Pa słovach spadaryni Daškievič, jašče siem artystaŭ viciebskaha teatra imia Jakuba Kołasa znachodziacca ŭ balnicy, u piaci ź ich pnieŭmanija. Na žal, atrymać kamientary ŭ pradstaŭnikoŭ Minzdaroŭja, kab supastavić infarmacyju žonki pavažanaha čałavieka z aficyjnaj pazicyjaj, praktyčna niemahčyma.
U Viciebsku ž zdaryŭsia vypadak, jaki trapiŭ u ŚMI, kali pamierła 58-hadovaja žančyna, jakaja była špitalizavanaja ź pnieŭmanijaj i mieła pry hetym spadarožnyja prablemy sa zdaroŭjem. Svajakam pazvanili i paprasili samaizalavacca, skazali, što byŭ paćvierdžany karanavirus. Paśla Minzdaroŭja abvierh hetuju infarmacyju i zapeŭniŭ, što Covid-19 nie mieŭ miesca.
Na žal, aficyjnaja infarmacyja pra kolkaść pacyjentaŭ z dyjahnazam «pnieŭmanija» ŭ Viciebsku i vobłaści nie publikujecca.
Ad 27 sakavika pa rasparadžeńni ministra ŭnutranych spraŭ milicyjanieram zabaranili vyjazdžać ź Viciebskaj vobłaści i ŭjazdžać u jaje.
U toj ža čas prafiłaktyčnyja abmiežavańni ŭ Viciebsku nie strohija.
Transpart u horad chodzić pa-raniejšamu. U maršrutkach «Paŭnočnaha ekspresa» kažuć, što ŭsie rejsy ź Minska na Viciebsk i ź Viciebska vykonvajuć pa płanie.
Pradpryjemstvy Viciebska pracujuć, jak i raniej.
«Začyniena tolki abutkovaja fabryka «Čyrvony Kastryčnik» praz toje, što tam byli vypadki zachvorvańnia ŭ supracoŭnikaŭ», — raskazvaje žychar Viciebska Chrystafor Žalapaŭ.
U «Čyrvonym Kastryčniku» infarmacyju pra karancin paćvierdzili. Pryčyny nie nazyvajuć, kažuć tolki, što taki režym uviedzieny ŭ ich z 16 sakavika. «Biełviest» i «Marka» pry hetym pracujuć u zvyčajnym režymie.
«Naša Niva» pisała, što čutki pra śmierć ad karanavirusa dyrektara «Marka» vyjavilisia fejkam.
Viciebski harvykankam zaćvierdziŭ płan dadatkovych mierapryjemstvaŭ pa prafiłaktycy karanavirusa i inšych reśpiratornych infiekcyj. Tam šmat punktaŭ. Małych dziaciej baćkam dazvolili nie vadzić u sadok, inšaharodnim studentam nielha budzie jeździć na vychadnyja dadomu. U biblijatekach nie buduć pracavać čytalnyja zały, a ŭ restaranach klijentaŭ buduć rassadžvać na adlehłaści nie mienš za 1,5 mietra. Kiraŭnikoŭ arhanizacyj zaklikajuć nie dapuskać da pracy ludziej ź simptomami reśpiratornych zachvorvańniaŭ.
Čas pracy kafe i načnych kłubaŭ prosta abmiežavali. Ułaśnikam pra heta rašeńnie paviedamili jašče paru dzion tamu.
«U subotu patelefanavali z harvykankama, a potym chadzili i supracoŭniki milicyi, kazali, kab pracavali tolki da 23-j hadziny», — raskazvaje dyrektar art-paba «Torvald» Vital Broŭka.
Na jaki čas uvodzicca hetaje abmiežavańnie hrafika pracy, pakul nieviadoma.
«Nas prosta papiaredzili: «Nie nadumajcie žartavać». Supracoŭniki, kiraŭniki inšych ustanoŭ chvalujucca», — kaža Vital Broŭka.
Pa jaho słovach, ludziej u viciebskich kafe značna pamienieła. Naviedvalnaść art-paba, naprykład, upała napałovu.
U internecie taksama źjaviłasia infarmacyja, što ŭ Viciebsk prosiać nie viartacca inšaharodnich studentaŭ i čakać dalejšych ukazańniaŭ.
U Viciebskim dziaržaŭnym univiersitecie imia Mašerava, adnosna jakoha raspaŭsiudžvajucca takija čutki, heta admaŭlajuć.
«Nie, kaniečnie, takoj rekamiendacyi nie było. Na siońnia my tolki raźmiežavali patoki studentaŭ, kab nie było skapleńnia ludziej: pieršyja pary admianili, zrušyli raskład, — raskazała «Našaj Nivie» rektarka ŭniviersiteta Valancina Bahatyrova. — My dazvalajem, kali student drenna siabie adčuŭ, pracavać u afłajn-režymie. Heta robicca pa asobnaj zajavie. Časam baćki chvalujucca, ich možna zrazumieć. Ale takija vypadki, kali chtości pa zajavie pieravioŭsia na afłajn-režym, adzinkavyja».
U Viciebskim abłvykankamie admovilisia prakamientavać epidsituacyju ŭ horadzie. «Ničoha nie mahu pakul vam dać», — skazała «Našaj Nivie» namieśnica načalnika hałoŭnaha ŭpraŭleńnia achovy zdaroŭja Ludmiła Kavalova, pierš čym pakłaści słuchaŭku.
Hetaja abstanoŭka sakretnaści i niervoznaści adroźnivaje Biełaruś ad inšych krain, jakija sutyknulisia z pandemijaj. U adroźnieńnie ad Rasii, Kazachstana, Polščy, Litvy dy inšych krain infarmacyja pra kolkaść chvorych abviaščajecca nierehularna, abryvačna, časam navat u zahadkavaj, rebusnaj formie. U adroźnieńnie ad inšych krain u Biełarusi nie publikujecca aficyjnaj infarmacyi pra hieahrafičnuju łakalizacyju vyjaŭlenych vypadkaŭ Covid-19, što daje padstavu dla roznych čutak. Minzdaroŭja tłumačyć taki padychod niežadańniem pravakavać paniku.
