Minzdaroŭja apublikavała apošniuju infarmacyju pra raspaŭsiudžvańnie karanavirusnaj infiekcyi ŭ Biełarusi. Praŭda, zrazumieć ź jaje, kolki vypadkaŭ COVID-19 zarehistravana ŭ Biełarusi, niemahčyma.
«U Biełarusi na siońnia praviedziena bolš za 31 tysiaču testaŭ na karanavirusnuju infiekcyju.
Za apošnija sutki ŭ lačebnyja ŭstanovy krainy z padazreńniem na karanavirusnuju infiekcyju pastupiła 11 čałaviek, vypisali 128 čałaviek, u tym liku 6 pacyjentaŭ, u jakich raniej test na COVID-19 daŭ stanoŭčy vynik.
Zarehistravali pieršy vypadak śmierci ŭzrostavaha pacyjenta z najaŭnaściu šmatlikich chraničnych zachvorvańniaŭ, pa papiarednich danych, abciažaranych karanavirusnaj infiekcyjaj», — paviedamlaje Minzdaroŭja.
Čytajcie taksama: Śmierć ad karanavirusa: zasłužany artyst Biełarusi Viktar Daškievič
Apošni raz Minzdaroŭja publikavała infarmacyju pra kolkaść infikavanych u paniadziełak 30 sakavika. Tady ź jaje vynikała (choć naŭprost nie havaryłasia) kolkaść 152. Pierad tym infarmacyju davali ŭ piatnicu 27 sakavika. Tady ź infarmacyi vynikała ličba 94 čałavieki.
Učora Minzdaroŭja havaryŭ, što «vypisanyja albo čakajuć vypiski ŭ najbližejšy čas 47 čałaviek» z dyjahnazam COVID-19. U toj ža čas siońnia Alaksandr Łukašenka zajaviŭ, što vylečyłasia ad karanavirusa «bolš za 100 čałaviek».
Što adbyvajecca ŭ Viciebsku? Infarmacyja ad uładaŭ skupaja, ludziej tryvožać šmatlikija pnieŭmanii
Hetaja abstanoŭka sakretnaści i niervoznaści adroźnivaje Biełaruś ad inšych krain, jakija sutyknulisia z pandemijaj. U Rasii, Kazachstanie, Polščy, Litvie dy inšych krain infarmacyja pra kolkaść chvorych abviaščajecca rehularna, z hieahrafičnaj łakalizacyjaj vyjaŭlenych vypadkaŭ. Minzdaroŭja Biełarusi tłumačyć svoj padychod niežadańniem pravakavać paniku. Varta aznačyć, što napačatku Minzdaroŭja davała vyčarpalnuju infarmacyju pra chod pandemii, ale ŭsio spyniłasia paśla sustrečy ministra achovy zdaroŭja z Alaksandram Łukašenkam, jaki nazvaŭ situacyju z karanavirusam «psichozam».
Usiaho ŭ śviecie ad karanavirusa pamierła ŭžo amal 40 tysiač čałaviek i kolkaść chvorych praciahvaje narastać. Krainy, u tym liku raźvityja, prykładajuć namahańni, kab strymać raspaŭsiud infiekcyi šlacham karancinnych mier i pryvučeńnia ludziej da zachadaŭ pieraściarohi.
