Analityk Andrej Jelisiejeŭ źviarnuŭ uvahu na toje, što niekalki dzion tamu premjer-ministr Sinhapura vystupiŭ z telezvarotam ab uzmacnieńni mier u baraćbie z karanavirusam: amal usie navučalnyja ŭstanovy zakryvajucca, na dystancyjku abaviazkova pieravodziacca ŭsie, chto moža heta zrabić, abmiažoŭvajecca kolkaść hramadskich ustanoŭ, što pracujuć.
Hetaja navina važnaja dla Biełarusi, tamu što my ŭ svajoj stratehii baraćby z karanavirusam, jak dekłaravałasia, aryjentavalisia na karejska-sinhapurski varyjant: biez žorstkich mier sacyjalnaha dystancyjavańnia, a tym bolš biez karancinnych mier, zatoje z masavym testavańniem i chutkaj izalacyjaj zaražanych i ich kantaktaŭ, adznačaje analityk. Pry hetym Sinhapur byŭ značna bolš paśpiachovy ŭ realizacyi svajoj stratehii.
Zaraz sinhapurskija ŭłady pryznalisia, što navat ź ich aktyŭnaj realizacyjaj stratehii jany pačali stračvać kantrol nad situacyjaj. Jany dyjahnastavali pa 10 novych vypadkaŭ u dzień, apošnim časam pa 50 i bolš, łancužki zaražeńnia stali hublacca. Tamu Sinhapur źviarnuŭsia da dadatkovaha naboru mier sacyjalnaha dystancyjavańnia pa prykładzie jeŭrapiejskich krain.
«Heta toje, što nam treba było zrabić jašče našmat raniej, tamu što ŭ nas praktyčnaja realizacyja abranaj stratehii kulhała i łancužki byli zhublenyja raniej», — ličyć Andrej Jelisiejeŭ.
