Zaražeńnie ludziej karanavirusnaj infiekcyjaj paćvierdžana ŭ dzieviaci rajonach Viciebskaj vobłaści, u sieradu dadalisia Dokšycki i Pastaŭski, paviedamlajuć «Narodnyja naviny Viciebska».
U Pastaŭskim rajonie na lačeńni ŭ centralnaj rajonnaj balnicy znachodziacca dvoje chvorych na COVID-19, pra heta paviedamiła hazieta «Pastaŭski kraj» sa spasyłkaj na hałoŭnaha sanitarnaha lekara rajona Śviatłanu Raśsiejevu.
Pra toje, što ŭ balnicy ŭ Dokšycach znachodziacca pacyjenty z karanavirusnaj infiekcyjaj, taksama stała viadoma ŭ sieradu. Na žal, kolkaść chvorych nieviadoma. Adnak patencyjna tam situacyja moža być vielmi haračaj, bo ŭ rajonie špitalizavana 85 chvorych ź pnieŭmanijami.
Amal u dva razy — z šaści da adzinaccaci — pavialičyłasia kolkaść chvorych u Aršanskim rajonie. Adnak tam zmahli vypisać 22 pacyjentaŭ, u jakich paŭtorny analiz na RNK karanavirusa daŭ admoŭny vynik.
Pra druhoha infikavanaha karanavirusam žychara rajona paviedamlaje ušackaja hazieta. Novamu pacyjentu ŭsiaho 17 hadoŭ. U rajcentry płanujuć pačać dezynfiekcyju padjezdaŭ i vulic.
