Fota Nadziei Bužan
My sabrali dla vas infarmacyju pra toje, u jakich miescach situacyja samaja napružanaja, dzie ludziam treba asabliva pieraścierahacca i dbać pra zdaroŭje svaich blizkich, asabliva starejšych ludziej.
Śpis składzieny jak na asnovie adkrytaj infarmacyi, što była apublikavanaja asobnymi sanstancyjami i ŭstanovami achovy zdaroŭja, tak i na asnovie infarmacyi, jakuju žurnalisty atrymlivajuć ad daktaroŭ i čynoŭnikaŭ ź miescaŭ.
«Dokšyckaja plama»
Jak paviedamiła 7 krasavika hałoŭnaja doktarka rajonnaj palikliniki, u malupasieńkim rajonie było zafiksavana 85 pnieŭmanij. Hetaja ścipłaja i aściarožnaja zajava, apublikavanaja ŭ rajonnaj haziecie, dazvoliła zrazumieć maštab prablemy.
Na siońnia hetaja ličba ŭžo našmat bolšaja, bo ludzi praciahvali pastupać u špitali. 11 krasavika čytačy nazvali «Našaj Nivie» imiony prynamsi 7 čałaviek, jakija pamierli ad pnieŭmanii ŭ rajonie. Na siońnia i hetaja ličba, vierahodna, vyrasła.
Pacyjentami zapoŭnienyja balnicy ŭ Dokšycach i Biahomli.
Pačałasia «Dokšyckaja plama», mahčyma, ź viernicy adnoj z kanfiesij, što viarnułasia z balnicy ź Viciebska ŭ siaredzinie sakavika, ale daŭno vyjšła za miežy adnoj kanfiesii ci hrupy.
Čytajcie taksama:
Dokšyckaja plama. Za niekalki dzion u maleńkim haradku ad pnieŭmanii pamierli, jak minimum, troje
«Viciebskaja plama»
Pa słovach ministra achovy zdaroŭja Biełarusi, pa stanie na 11 krasavika ŭ horadzie było špitalizavana kala 1000 pacyjentaŭ z dyjahnazam «pnieŭmanija».
Akramia taho, mnohija ź lohkimi formami zachvorvańniaŭ lečacca doma.
13 krasavika Alaksandr Łukašenka pryznaŭ, što na Viciebščynie «3-4 dni tamu dadavałasia pnieŭmanij — 280 navat było za sutki». Heta ŭ razy pieravyšaje zvyčajny dla hetaha siezona pakazčyk.
Pacyjentaŭ z karanavirusam i pnieŭmanijami raźmiaščajuć u Abłasnoj kliničnaj balnicy (tolki tam na siońnia lažyć kala 400 čałaviek ź pnieŭmanijami), Abłasnym kliničnym dyjahnastyčnym centry (byłym Čyhunačnym špitali), Tubdyspansiery, Skurviendyspansiery. Pa śviedčańni Śviatłany Daškievič, žonki pamierłaha Viktara Daškieviča, jany byli pierapoŭnienyja ŭžo ŭ siaredzinie sakavika. Pad pryjom ź pnieŭmanijami pieraprafilavali taksama adzin z ankakarpusoŭ.
Ličycca, što «Viciebskaja plama» pačałasia sa śpiecyjalistaŭ abutkovych fabryk (Viciebsk — centr abutkovaj pramysłovaści Biełarusi), jakija ŭ lutym latali na mižnarodnuju vystaŭku ŭ Miłan (Łambardyja, Italija), dzie akurat tady razharaŭsia ahmień pandemii — infiekcyja tudy trapiła z Kitaja. Praz adsutnaść karancinu i naležnych tłumačalnych mier virus chutka raspaŭsiudziŭsia roznymi łancužkami.
Viadoma pra śmierć zasłužanaha artysta Biełarusi Viktara Daškieviča, 58-hadovaha adstaŭnoha prakurorskaha rabotnika, 70-hadovaha adstaŭnoha maraka, 73-hadovaj Alaksandry Čepik, 58-hadovaj Taćciany Chuziejevaj.
Čytajcie taksama:
Śmierć ad karanavirusa: zasłužany artyst Biełarusi Viktar Daškievič
Žonka viciebskaha artysta, jaki ŭ reanimacyi z karanavirusam: My byli ŭ troch balnicach, jany pierapoŭnienyja
Łukašenka pra pamierłaha artysta Daškieviča: Čaho ty chodziš pa hetaj vulicy i tym bolš pracuješ?
Šarśnioŭ na sustrečy z SAAZ: Pieršych chvorych na COVID-19 u Viciebsku vyjavili ŭ lutym
Biešankovicki, Šumilinski rajony Viciebskaj vobłaści, Połack i Navapołack, Orša, Ušačy źviazanyja z «Viciebskaj plamaj». U Biešankovičach pamierła rabotnica sanstancyi, jakaja pravodziła dezynfiekcyju na bazie adpačynku viciebskich abutkavikoŭ. U Šumilinie — 60-hadovy mužčyna.
Čytajcie taksama: List ź Biešankovič pad Viciebskam: «U nas tut situacyja, jak u 1941-m. Miedyki, nizki Vam pakłon!»
Ź Viciebska ciahnucca nitački ŭ inšyja harady Biełarusi. Tak, paviedamlałasia, što ŭ Breście zachvareła studentka, što viarnułasia ź Viciebska, i čyhunačnik, jaki kantaktavaŭ ź viciebskimi.
Mnohija pradpryjemstvy i ŭstanovy Viciebska, jak i Minska, pieraviali svaich supracoŭnikaŭ na addaleny režym pracy. Inšyja, u tym liku dziaržaŭnaj formy ŭłasnaści, adpravili svaich nie krytyčna patrebnych supracoŭnikaŭ u adpačynki — ci apłačanyja, ci za svoj košt.
Miarkujučy pa viadomaj ŚMI kolkaści vypadkaŭ, situacyja ŭ Dokšyckim rajonie i horadzie Viciebsku nastolki ž składanaja, jak u samych zaražanych zonach Jeŭropy kštałtu Łambardyi ci Madryda, ale my pakul na niekalki tydniaŭ «zzadu» pa hrafiku epidemii.
Minsk
Pakul statystyka pa rehijonach publikavałasia, bolš za pałovu vypadkaŭ adnosilisia da stalicy. Jak pakazvaje prykład Uchania i Ńju-Jorka, raspaŭsiud karanavirusa ŭ vialikich haradach moža adbyvacca asabliva imkliva.
U stalicy pacyjentaŭ z karanavirusam, padazreńniami na jaho i pnieŭmanijami prymajuć ciapier infiekcyjnaja balnica, 6-ja, 10-ja i 3-ja kliničnyja balnicy. Pad ekstrannyja patreby pieraprafilavany i adzin z karpusoŭ 4-j kliničnaj balnicy.
Jak «Našaj Nivie» viadoma ad miedykaŭ, za apošni miesiac bieź lišniaj ahałoski była praroblenaja vialikaja praca pa pieraabstalavańni balnic z tym, kab patok pacyjentaŭ ź pnieŭmanijami nie pieraškodziŭ nadańniu nieadkładnaj dapamohi inšym katehoryjam chvorych i kab raźvieści patoki inficyravanych i nieinficyravanych pacyjentaŭ. «Prosta kałasalna šmat zrabili», — skazaŭ «Našaj Nivie» adzin z daktaroŭ, mnohija ź jakich pracujuć u maksimalnym režymie.
Akramia taho, u Minsku i Viciebsku ŭłady rychtujuć palikliničny piersanał być hatovym pry patrebie da pieravodu na pracu ŭ balnicy.
Niekatoryja ŭstanovy achovy zdaroŭja prapanavali piersanału starejšaha ŭzrostu i z hrup ryzyki časova pajści ŭ adpačynak, kab źmienšyć ryzyku dla ich zdaroŭja.
Niamała vypadkaŭ pnieŭmanij i ŭ Minskim rajonie. U pryvatnaści, havorka była pra sanatoryj «Praleska» ŭ Ždanovičach.
Siarod pamierłych — jaho elektryk Valer Š.
Čytajcie taksama:
Tryvožnyja naviny z sanatoryja «Praleska»: karanavirus vyjavili ŭ niekatorych adpačyvalnikaŭ. Usie jany pažyłyja
U Minsku pamior jašče adzin pacyjent z karanavirusam: jon adpačyvaŭ u «Pralescy»
U ambułatoryi Ždanovičaŭ — dva vypadki pnieŭmanij u miedpiersanała. Špitalizavali i ich rodnych
Siarod inšych viadomych epizodaŭ ź Minska — śmierć 60-hadovaha inžyniera adnaho z sakretnych pradpryjemstvaŭ.
Ad viadomaha dramaturha Andreja Kurejčyka stała viadoma pra toje, što jahony tata zaraziŭsia ŭ inšym sanatoryi — Ministerstva ŭnutranych spraŭ.
Viadoma, što bolšaja častka z 301 (pa stanie na 10 krasavika) zaražeńnia miedykaŭ taksama adbyłasia ŭ Minsku.
«Paleskaja plama»
Z paviedamleńnia Bresckaj abłasnoj sanstancyi — paźniej vydalenaha — i słoŭ staršyni Bresckaha abłvykankama viadoma, što pa stanie na 8 krasavika bolš za pałovu vypadkaŭ karanavirusa ŭ vobłaści prypadała na Łuniniecki rajon.
Čytajcie taksama: Što adbyvajecca z łuninieckimi siłavikami?
U ŚMI źviarnułasia dyrektarka kramy «Jeŭraopt» u Łunincy i raskazała, što jana razam z mužam ciažka chvareła na pnieŭmaniju, ale brać u ich analiz na karanavirus admaŭlalisia, pakul muž nie trapiŭ u reanimacyju, a samu jaje siastra pryviezła ŭ Minsk i ślozna paprasiła špitalizavać tut.
Viadoma taksama, što ŭ susiednim Žytkavickim rajonie ŭ žančyny ź ciažkaj pnieŭmanijaj spačatku dyjahnastavali karanavirus, a paśla abvierhli heta. Ale nieŭzabavie ŭ Homielskaj infiekcyjnaj balnicy pamior 63-hadovy mužčyna, jaki pracavaŭ na tym ža zavodzie, što i žančyna. Pra vypadak karanavirusa paviedamlałasia i ŭ susiednim Lelčyckim rajonie, a ŭ Pinsku pamior 46-hadovy žurnalist, syn jaho ciapier na izalacyi ŭ rajonnaj infiekcyjnaj balnicy.
Prynamsi ŭ 11 čałaviek vyjavili karanavirus u susiednim Akciabrskim rajonie Homielskaj vobłaści.
Prynamsi piać zaražanych — u Buda-Kašaloŭskim rajonie Homielskaj vobłaści. Ale apošni vypadak, chiba što z paleskaj plamaj nie źviazany. Mahčyma, jon pajšoŭ praz adnu sa spartškoł u Homieli.
«Plama na AES»
Ułady Biełarusi paviedamili pra vyjaŭleńnie karanavirusa ŭ 15 rabočych, jakija pryjechali z Urała, z Rasii. Praŭda, paśla prahučała, što infarmacyja patrabuje dadatkovaj pravierki. Ale ŭ izalacyju byli adpraŭlenyja i inšyja rabotniki budoŭli.
Inšyja rajony — pakul niešmatlikija vypadki
U astatnich rajonach vypadki karanavirusa pakul zastajucca niešmatlikimi, havorka pra adzinki ci dziasiatki vypadkaŭ. Tak, u Kapylskim rajonie ŭsio, mahčyma, pačałosia z dalnabojščyka, jaki viarnuŭsia da maci. A najbolš paciarpieli piedahohi adnoj sa škoł. 70-hadovaja nastaŭnica pamierła.
U Barysavie ad pnieŭmanii zhareŭ 50-hadovy fielčar chutkaj dapamohi.
Paviedamlałasia pra vypadki ŭ Starobinie, Vilejcy, Staŭbcoŭskim rajonie, Lidzie, Iŭjeŭskim rajonie, Hrodnie, Breście, Janavie, Baranavičach, Kosavie, Homieli, Kryčavie, Babrujsku, Škłovie dy inšych miascovaściach.
Musim razumieć, što ź virusam možam sutyknucca ŭsiudy. Z hetym nam pryjdziecca žyć nastupnyja 6, a moža być i 18 miesiacaŭ, papiaredžvaje Suśvietnaja arhanizacyja achovy zdaroŭja. Strymać epidemiju mohuć tolki śviadomyja dy adkaznyja pavodziny. Treba čaściej myć ruki, nie dakranacca niamytymi rukami da vačej, nosa i rota. A hałoŭnaje — abmiežavać niepatrebnyja kantakty i paźbiahać miescaŭ zboru ludziej i masavych mierapryjemstvaŭ.
