Fota Nadziei Bužan
Doktarka pryjomnaha adździaleńnia 10-j haradskoj kliničnaj balnicy Minska ŭ svaim twitter pieryjadyčna robić karysnyja dopisy pra pracu padčas pandemii. Jana raspaviała, što kolkaść pacyjentaŭ prykmietna vyrasła paśla Vialikadnia, paviedamlaje Tut.by.
Učora ŭ twitter doktara źjaviłasia publikacyja pra toje, što vyrašać, kamu z pacyjentaŭ bolš patrebna kisłarod, — ciažka. My vyrašyli vyśvietlić, što miedyk mieła na ŭvazie.
Doktar patłumačyła, što pakul situacyja nie krytyčnaja, miedyki spraŭlajucca z patokam pacyjentaŭ, jaki prykmietna vyras paśla Vialikadnia. Ale što budzie dalej — nieviadoma. Kisłarod (a nie ŠVŁ) — heta miera, pry jakoj dapamahajuć nasycić kroŭ kisłarodam praz trubački. Adnak jaho treba padklučyć da štekieraŭ u pałatach. I kali balnica pieršapačatkova była šmatprofilnaj, a tolki va ŭmovach pandemii stała infiekcyjnaj, hetyja štekiery jość nie ŭ kožnaj pałacie.
— Padčas źmieny mnie treba było pieravodzić pacyjentaŭ, u jakich stan horšy, mienavita ŭ tyja pałaty, dzie jość mahčymaść padklučyć kisłarod. A tych, kamu ŭžo lepš, — u inšyja pałaty, biez kisłarodu. Kisłarodu ŭ nas dastatkova, ale padklučyć jaho možna nie ŭ kožnaj pałacie, bo naša klinika pieršapačatkova nie infiekcyjnaja, dzie b heta było paŭsiudna. Padklučyć pacyjenta da kisłarodu možna tolki ŭ peŭnych adździaleńniach, i tudy my i starajemsia kłaści bolš ciažkich pacyjentaŭ. Pacyjenta na kisłarod my kładziom jak minimum na dzień, kab adnavić uzrovień kisłarodu ŭ kryvi, ale ŭ cełym kab stan stabilizavaŭsia, treba niekalki dzion, — kaža Darja Čechava, terapieŭt pryjomnaha adździaleńnia 10-j haradskoj kliničnaj balnicy. — Učora za sutki špitalizavali kala 100 čałaviek, ale ŭ nas volnyja miescy jość, bo balnica raźličana na vialikuju kolkaść pacyjentaŭ i stacyjanar u cełym ličycca vialikim.
Patok pacyjentaŭ prykmietna pačaŭ raści paśla Vialikadnia, pry hetym šmatlikija pacyjenty adznačali, što zachvareli vyrazna 24 krasavika (pravasłaŭny Vialikdzień byŭ 19 krasavika) — heta jakraz siaredni pa praciahłaści inkubacyjny pieryjad.
Nahadajem, raniej paviedamlałasia, što simptomy karanavirusa, jak praviła, pačynajuć prajaŭlacca na 5-7 sutki paśla zaražeńnia.
