12 maja ŭ milicyju pryjšła žycharka vioski Brynioŭ (Pietrykaŭski rajon, Homielskaja vobłaść). Žančyna paviedamiła, što źnik jaje brat, jaki žyŭ u susiednich Laskavičach. Pačalisia pošuki. Zabitaha mužčynu znajšli ŭ kanavie.
Chutka zatrymali i dvaich padazravanych, im 30 i 40 hadoŭ.
Zabitaha zvali Aleh Braim, jamu było 53 hady. Mužčyna niaredka vypivaŭ, byŭ druhi raz žanaty. Žonka, jak kažuć, taksama była amatarkaj ałkaholnych napojaŭ.
«Ale minułym letam jany razyšlisia. Pačalisia svarki. U Aleha byŭ nadzieł, jaki jon sam nabyvaŭ. A dom budavaŭ, kali ŭžo ažaniŭsia. I praz hety dom z toj žonkaj jany ŭsio svarylisia, — raspaviali «Našaj Nivie» svajaki zahinułaha. — Paŭtara hoda tamu žonka zastrachavała žyćcio i zdaroŭje Aleha na vialikuju sumu, bo viedała, što jon pje i ź im usio što zaŭhodna moža zdarycca».
Žonka źjechała ad Aleha. Ale svajaki ŭpeŭnienyja, što ciapier žančyna nibyta admysłova davodziła muža (jany tak i nie raźvialisia), nibyta kab paśla śmierci atrymać dom i strachoŭku.
«Niedzie tydzień-dva tamu ŭ toj žonki źjaviŭsia novy sužyciel. Aleh pra heta daviedaŭsia. Moža, praz heta, moža, praź inšaje pajšoŭ jon da jaje na pracu 7 maja. Jany mocna pasvarylisia, — kažuć ludzi. — Uviečary žančyna praskardziłasia na muža novamu sužycielu. Toj uziaŭ siabra i pajšoŭ na razborki».
«Razborki» skončylisia zabojstvam Aleha Braima.
«Jany spačatku jaho bili kala doma, paśla jon sprabavaŭ uciačy ad ich. Złavili na skryžavańni, praciahnuli bić: tam kryvi na asfalcie, nibyta kabana zarezali, — raspaviała «Našaj Nivie» siastra zahinułaha. — Zatym Aleha ci to kinuli ŭ kanavu, ci to admysłova ŭtapili ŭ joj».
Svajaki zabitaha ŭpeŭnienyja: u tuju ž noč zabojcy paviedamili pra śmierć Aleha jaho byłoj žoncy.
«I jaje praz paru dzion bačyli kala toj kanavy — chadziła hladzieć, ci nie ŭspłyvie cieła», — kažuć svajaki Aleha.
Praŭda, pa inšaj viersii, žančyna chadziła pa vioscy, šukała, dzie moža być jaje muž, jaki raptam źnik.
Cieła Aleha Braima znajšli praz čatyry dni, paśla taho jak u milicyju pryjšła jaho siastra. Jaho pachavali 15 maja.
Žonku Aleha spačatku zatrymali, paśla adpuścili. Pakul što jana na voli.
Padazravanyja ŭ zabojstvie ciapier pad vartaj. Im pahražaje vyšejšaja miera pakarańnia — rasstreł.
