Hienieralny dyrektar pradpryjemstva «Mahiloŭski zavod liftavaha mašynabudavańnia» i eks-sienatar Barys Kavaleŭski zatrymany. Pra heta Tut.by paviedamili niekalki nie źviazanych pamiž saboj krynic. Pavodle nieaficyjnaj infarmacyi, zatrymańnie źviazana z karupcyjaj i pastaŭkami liftaŭ u Rasiju.
Fota: liftmach.by
Sakratar hiendyrektara Alena Doŭhušava skazała, što Barys Kavaleŭski «ŭžo kala tydnia na balničnym». I kali vierniecca na pracu — nieviadoma.
Pry hetym supracoŭniki pradpryjemstva i inšyja krynicy, tak ci inakš źviazanyja z «Mahiloŭliftmašam» i Kavaleŭskim, śćviardžajuć, što Barysa Viktaraviča zatrymali 4 maja z dokazami złačynstva, heta značyć pry atrymańni abo pieradačy chabaru. Krynicy taksama kažuć ab zatrymańni «pa hetaj spravie» 12 čałaviek.
Na hety momant Śledčy kamitet «nie vałodaje nijakaj infarmacyjaj» pra zatrymańnie Kavaleŭskaha.
Aficyjny pradstaŭnik KDB Andrej Jaraš «nie zmoh paćvierdzić abo abvierhnuć infarmacyju» pra zatrymańnie Kavaleŭskaha.
Barysu Kavaleŭskamu 57 hadoŭ, jon rodam z Hruzii. Pačynaŭ pracavać elektramancioram na Aršanskim zavodzie lohkaha mašynabudavańnia. U 2014 hodzie Łukašenka pryznačyŭ Kavaleŭskaha hienieralnym dyrektaram chołdynhu «Mahiloŭliftmaš». U skład chołdynha ŭvachodziać try pradpryjemstvy ŭ Mahilovie — zavody «Mahiloŭliftmaš», «Zienit» i «Elektraruchavik» — i zavod «Vietraź» u Biahomli Viciebskaj vobłaści.
Barys Kavaleŭski byŭ členam Savieta Respubliki 6-ha sklikańnia — u 2016—2019 hadach.
