Fota Dźmitryja Bruško
Hrupa «Trajpł» nakiravała ŭ Ekanamičny sud Minska zajavu ab bankructvie, ale heta nie adziny praces, jaki viadziecca ŭ dačynieńni da majomaści asnoŭnaha ŭładalnika kampanii Juryja Čyža. Pavodle infarmacyi TUT.BY, u červieni Nahinski haradski sud Maskoŭskaj vobłaści razhledzić pazoŭ Śviatłany Čyž da jaje muža, Juryja Čyža. Pazoŭ padadzieny ab padziele častki sumiesna nažytaj z mužam majomaści.
Havorka idzie ab čatyroch akcyjach ZAT «Handlovy dom «BiełAZ» (4% statutnaha kapitału) naminalnym koštam 30 tysiač rasijskich rubloŭ kožnaja. U zajavie ŭkazana, što akcyi byli ŭ sumiesnaj ułasnaści muža i žonki, ale ŭ listapadzie 2018 hoda Jury Čyž ich pradaŭ — pa naminale, to bok, za 120 tysiač rasijskich rubloŭ. Pakupnik — AAT «BiełAZ».
U zajavie ŭkazana, što ab ździełcy Śviatłana Čyž daviedałasia tolki ŭ lutym 2020 hoda, heta značyć akcyi byli pradadzienyja bieź jaje viedama i zhody.
Pazoŭnica ličyć, što cana ździełki była zanižanaja: zychodziačy z koštu čystych aktyvaŭ ZAT «HD BiełAZ», pakiet Čyža kaštavaŭ 124 młn rasijskich rubloŭ, heta značyć, bolš čym u sto razoŭ daražej.
Pazoŭ padadzieny ŭ Nahinski sud, bo ŭ Nahinsku, pa śćviardžeńni pazoŭnicy, pražyvaje Juryj Čyž.
Zasnavalnikami ZAT «Handlovy dom BiełAZ», hienieralnaha dystrybjutara BiełAZa ŭ Rasii, źjaŭlajucca Prezidencki spartkłub (48% dolaj), ZAT «UrałBiełAZsiervis» (48%) i sam BiełAZ (4%).
Na BiełAZie admovilisia ad kamientaroŭ.
